2023 jyly memleket týrızm salasynda 829 mln teńge sýbsıdııa tólegen
ASTANA. KAZINFORM – Eldegi týrızm salasynda qyzmet kórsetetin kásiporyndar men kásipkerler bıýdjetten 7 baǵyt boıynsha sýbsıdııa alyp otyr. Týrızm jáne sport mınıstrliginiń Kazinform saýalyna joldaǵan jaýabynda osyndaı derek bar.
Vedomstvonyń aqparaty boıynsha týrızmdi memleket bıýdjetinen qoldaý 7 baǵyt arqyly júredi. Birinshisi – týroperatorlardyń sheteldik týrıst tartýǵa ketken shyǵyndaryn sýbsıdııalaý (1 sheteldik týrıske – 15 000 teńge).
«2023 jyly 8 175 sheteldik týrıst úshin 122,6 mln teńge kóleminde sýbsıdııa tólendi. 2024 jyldyń alǵashqy jartysynda 202 sheteldik týrıske 3,03 mln teńge mólsherinde ótinim maquldandy. Ótinimderdi qabyldaý jalǵasýda», - dep jazady mınıstrlik mamandary.
Al 2-17 jastaǵy qazaqstandyqtarǵa el ishinde saıahat jasaǵanda tegin ushýǵa múmkindik beretin Kids Go Free baǵdarlamasynyń aıasynda 2023 jyly 90 mln teńge tólengen. 2024 jyldyń 2 toqsanynda 518 balaǵa 223 ótinim óńdelgen, sýbsıdııa somasy 28,2 mln teńge.
Kásipkerlik nysandardyń sanıtarııalyq-gıgıenalyq toraptardy ustaýǵa jumsaǵan shyǵyndarynyń sýbsıdııalaý baǵytynda 2023 jyly ákimdikter shamamen 40 mln teńgeniń sýbsıdııasyn maquldaǵan. 2024 jylǵy 1 toqsanyndaǵy jaǵdaı boıynsha ákimdikter shamamen 33,6 mln teńgeniń sýbsıdııasyn maquldaǵan.
Týrıstik qyzmet nysandaryn salý men rekonstrýktsııalaý shyǵyndaryn óteý baǵytynda 2023 jyly ákimdikter 169 mln teńgeniń 9 ótinimdi maquldasa, bıyl 3,4 mlrd teńgeniń 43 ótinimi maquldanǵan.
Jol boıyndaǵy servıs nysandaryn salý shyǵyndaryn óteý aıasynda 2023 jyly 355 mln teńgeniń 10 ótinimine oń sheshim qabyldansa, bıyl 635 mln teńgeniń 9 ótinimi maquldanyp otyr.
Taý shańǵysy kýrorttaryna jabdyq pen tehnıka satyp alý shyǵyndaryn óteý:
- 2023 jyly 2,8 mln teńge somasyna 2 ótinim;
- 2024 jyly 4 ótinim túsip, 2 ótinim qabyldanbady.
Týrıst tasý úshin syıymdylyǵy segiz orynnan asatyn avtomobıl satyp alý shyǵyndaryn óteý:
- 2023 jyly – 8 týravtobýsqa 50 mln teńge;
- 2024 jyly – 6 týravtobýsqa 36,2 mln teńge maquldandy.
