Byltyr memleket paıdasyna 627 mıllıard teńgeden asatyn ótemaqy qaıtarylǵan – Bas prokýror

ASTANA. KAZINFORM - Memleket basshysy Bas prokýror Berik Asylovty qabyldady, dep habarlaıdy Aqordanyń baspasóz qyzmeti.

Berik Asylov elimizdegi zań ústemdiginiń jaı-kúıi jáne qadaǵalaý organdarynyń basym baǵyttary boıynsha atqarǵan jumys qorytyndylary týraly baıandady

krımınogendik jaǵdaı jáne qylmystyq-quqyqtyq saladaǵy azamattardyń konstıtýtsııalyq qaqyn qamtamasyz etýge baǵyttalǵan sharalar jóninde esep berdi:

– prokýratýra organdary sotqa deıingi tergeý satysynda 32 myńnan astam zańsyz sheshimdi toqtatqan, bul ister Qylmystyq-protsestik kodekske saı kelmeıdi. 4 myń azamattyń qylmystyq iske negizsiz tartylýyna jol bermegen. Sonymen qatar zańsyz ustalǵan 1,5 myńnan asa adam bosatylǵan;

– Bas prokýrordyń qarsylyǵy negizinde Joǵarǵy sot 150 tulǵaǵa qatysty istiń mán-jaıyn oń baǵytqa ózgertip, sonyń ishinde 10 adam tolyq aqtalǵan;

áleýmettik-ekonomıkalyq salada 81 myń kásipkerdiń, 979 myń zeınetkerdiń, halyqtyń áleýmettik turǵydan az qamtylǵan toptarynyń jáne basqa da azamattardyń buzylǵan quqyqtary qalpyna keltirilgenin habarlady. 123 myń jumysshynyń eńbek quqyǵyn buzýǵa jol berilmegen. Jalpy somasy 4,5 mıllıard teńge bolatyn alıment boıynsha qaryz óndirilgen;

byltyr memleket paıdasyna 627 mıllıard teńgeden asatyn ótemaqy qaıtarylǵany jóninde aıtty;

ekonomıkaǵa 12 trıllıon teńgeden astam qarjy quıǵan 800 ınvestorǵa prokýrorlyq kómek berilgenin aıtty:

– prokýratýra aktisi boıynsha 136 laýazymdy tulǵa jaýapqa tartylǵan;

– prokýrorlar ınvestorlarǵa qatysty memlekettik organdardyń 712 sheshimine kelisim bermegen;

– ınvestıtsııalyq jobalarǵa qoldaý kórsetý barysynda «prokýrorlyq súzgini» paıdalaný óz tıimdiligin kórsetken;

– jalpyulttyq pýlǵa engen jobalardyń júzege asyrylýyn qadaǵalaýǵa múmkindik beretin Tsıfrly ınvestıtsııalyq platforma belsendi qyzmet atqaryp keledi;

qoǵam nazaryn aýdarǵan birqatar qylmystyq isti tergeý barysy jóninde málimet berdi;

qylmysqa qarsy kúreste tsıfrlyq tehnologııalardy jappaı engizý jóninde baıandady. Atap aıtqanda, izdeýde júrgen azamattardy «aqyldy» beınekameranyń kómegimen tabý (izdeýde júrgender sany 9,4 paıyzǵa azaıdy) tásili jolǵa qoıyldy.

Qasym-Jomart Toqaev «Zań jáne tártip» qaǵıdasyn iske asyrý, barlyq salada zańnamanyń saqtalýyn qamtamasyz etý jumystaryn jalǵastyrýdy tapsyrdy. Sondaı-aq alaıaqtyqqa qarsy is-qımyl, esirtki bıznesimen kúres, qoǵamdyq oryndarda quqyqbuzýshylyqtyń aldyn alý boıynsha quqyq qorǵaý men basqa da memlekettik organdardyń qyzmetin úılestirýdiń mańyzyn atap ótti.

Osyǵan deıin Aqordada birqatar taǵaıyndaý bolǵany týraly habarladyq.