Byltyr Mańǵystaýǵa 390 myńnan astam týrıst kelgen
AQTAÝ. KAZINFORM – Aımaqta jaǵajaı týrızmi qarqyndy damyp keledi. Resmı málimetke súıensek, byltyr óńirge 390 myńnan astam týrıst kelgen. Bul 2023 jylmen salystyrǵanda 125,8 paıyzǵa kóp. Týrıstterge 15 mıllıard teńgeniń qyzmeti kórsetilgen. Bul týraly Mańǵystaý oblystyq týrızm basqarmasy habarlady.
Basqarma bergen aqparattarǵa sáıkes, aımaqta týrıstterge arnalǵan nysandardyń sany 100-den asty. Bul burynǵyǵa qaraǵanda 2 paıyzǵa kóp. Sonyń ishinde 589 mıllıon teńgeniń 2 iri ınvestıtsııalyq jobasy bar. Olar – Munaıly aýdanyndaǵy «Eko-Otel» qonaqúıi jáne Túpqaraǵan aýdanyndaǵy «Caspiy Life» demalys bazasy. Atalǵan týrıstik nysandarda 25 jańa jumys orny ashylǵan.
Al, bıyl Aqtaýda «jyly jaǵajaı» aýmaǵynda 100 mıllıard teńgeniń 3 jobasy iske qosylady dep kútilýde. Nátıjesinde 150 jumys orny qurylmaq. Olar – golf-klýb, vıllalary bar golf-qonaqúı, saýda qatarlary jáne vıllalar men páterler kesheni qurylysynyń ekinshi kezeńi.
2025-2027 jyldar aralyǵynda Mańǵystaýda týrızm salasynda taǵy 12 jobany júzege asyrý josparlanǵan. Olar – akvaparkter, vızıt ortalyq, oqý-saýyqtyrý ortalyǵy jáne qonaqúı keshenderi. Bul jobalar iske asqanda, oblystyń áleýmettik-ekonomıkalyq damýyna oń serpin berip, týrısterdiń qyzyǵýshylyǵy odan ári arta túspek.
Quzyrly memlekettik organnyń málimetine súıensek, búgingi tańda týrızm salasyndaǵy bıznes sýbektilerin damytýǵa arnalǵan memlekettik baǵdarlamalar jetip artylady. Qazir kásipkerlerge qarjylyq qoldaý kórsetiledi, týrızm ınfraqurylymyn damytýǵa sýbsıdııalar beriledi. Sondaı-aq týrızm salasynda jumys isteıtin kásipkerler úshin jeńildetilgen nesıe qarastyrylǵan.
