Byltyr MÁMS-ke shaǵymymdanýshylardyń sany 14%-ǵa artqan

ASTANA. KAZINFORM – Ótken jyly qazaqstandyqtardyń Mindetti áleýmettik medıtsınalyq saqtandyrý aıasynda kórsetiletin medıtsınalyq qyzmetter sapasyna shaǵymy artqan. Bul týraly atalǵan qordyń basqarma tóraǵasy Ábilqaıyr Sqaqov málim etti.

«Ótken jyldyń qorytyndysy boıynsha halyqty mindetti áleýmettik medıtsınalyq saqtandyrýmen qamtý 1%-ǵa ıaǵnı 370 myń adamǵa artty. Jyl ishinde MÁMS-ke túsim 11%-ǵa (120 mlrd teńge) kóbeıse, al ınvestıtsııalyq kiris 46 mlrd teńgege nemese 1,7 ese artyp otyr. Sondaı-aq, medıtsınalyq kómekti qarjylandyrý 15%-ǵa (423 mlrd teńge) ulǵaıdy. Jalpy alǵanda, bul kórsetkishter ósimdi kórsetedi, biraq, salanyń qazirgi shynaıy jaǵdaıyn kórsetpeıdi», - dedi Ábilqaıyr Sqaqov Densaýlyq saqtaý mınıstrliginiń keńeıtilgen alqa otyrysynda.

Odan bólek, qor basshysy MÁMS salasyndaǵy problemalarǵa toqtalyp ótti.

«MÁMS qyzmetine patsıentterdiń shaǵymy da kóbeıdi. Ótken jyly shaǵymdar kólemi 2022 jylmen salystyrǵanda 14%-ǵa artty. Medıtsınalyq qyzmetter naryǵynda básekelestikti arttyrý men olardyń jalpy sapasyn jaqsartý arasynda baılanys joq. Búginde medıtsınalyq qyzmetterdiń 64%-yn jeke emhanalar kórsetedi. Atap aıtqanda, gemodıalız – 77%, konsýltatsııalyq-dıagnostıkalyq kómek – 59%, ońaltý – 50%. Ókinishke qaraı, bıznes josparly kómek kórsetýge umtylady, biraq áleýmettik máni bar medıtsınalyq baǵyttarǵa barmaıdy», - deıdi ol.