Byltyr kreatıvti qyzmet eksporty 250 mlrd dollardan asyp tústi – Úkimet otyrysy

ASTANA. KAZINFORM – Elimizde 2019 jyldan beri kreatıvti ekonomıka 3 ese ósti. Bul týraly Úkimet basshysy Oljas Bektenov málim etti.

- Byltyr kreatıvti taýarlar men qyzmetterdiń álemdik eksporty 250 mlrd dollardan asyp tústi. G20 Insights zertteý kompanııasynyń boljamyna sáıkes 2030 jylǵa qaraı kreatıvti ekonomıkanyń úlesi álemdik jalpy ishki ónimniń kem degende 10% quraýy tıis. Memleket basshysy halyqqa Joldaýynda kreatıvti ındýstrııany damytýdy qoldaý sharalarynyń toptamasyn ázirleýdi tapsyrǵan bolatyn. Tıisti zańnamalyq baza qabyldandy, - dedi Oljas Bektenov Úkimet otyrysynda.

Premer-mınıstrdiń málimdeýinshe, kreatıvti ekonomıka 2019 jyldan beri 3 ese ósti.

- Alaıda jalpy ishki ónimge qosqan úlesi salystyrmaly túrde áli de tómen deńgeıde, 1% shamasynda. Sonymen qatar keıbir «shyǵarmashylyq» salalardyń ósý qarqyny jekelegen óndiristik sektorlarǵa qaraǵanda joǵary bolyp otyr. Byltyr kompıýterlik oıyndardy ázirleý salasy jalpy qosylǵan qunǵa shamamen 460 mlrd teńge qomaqty úles qosty, - deıdi ol.

Eske sala ketsek, byltyr Májilistiń jalpy otyrysynda kreatıvti ındýstrııany damytýǵa qatysty jańa normalar engiziletini qaralǵan edi.