Byltyr kolledj túlekteriniń 81 paıyzy jumyspen qamtyldy
ASTANA. KAZINFORM – Osy oqý jylynda 550 myńnan astam stýdent kolledjde bilim alyp jatyr. Orta arnaýly bilim týraly Oqý-aǵartý mınıstri Ǵanı Beısembaev aıtyp berdi.
- 2024–2025 oqý jylynda kolledjderde 550 myńnan astam stýdent bilim aldy, 173 myń stýdent oqýyn aıaqtap jatyr. Onyń 123 myńy jumysshy biliktiligi boıynsha, al 27 myńy dýaldi oqytý aıasynda, 10 myń stýdent kásiporyndardyń maqsatty tapsyrysy boıynsha bitirdi. Jyl saıyn kolledj túlekterin jumysqa ornalastyrý kórsetkishi ósip jatyr: 2024 jyly túlekterdiń 81%-y jumyspen qamtyldy. Jumysshy mamandyqtar jyly aıasynda jumysshy mamandyqtardyń bedelin kóterýge jáne kolledjderdiń bıznespen ózara is-qımylyna asa nazar aýdarylyp jatyr, - dedi Ǵanı Beısembaev Úkimet otyrysynda.
Oqý jylynyń qorytyndysy boıynsha sheftik kómek kórsetetin kásiporyndardyń sany 7 ese artty. Búginde 4 myńnan astam kásiporyn 662 kolledjge sheftik kómek kórsetýdi bastady (ótken jyldyń qorytyndysy boıynsha 412 kolledjge 558 kásiporyn).
- Bıyl mektepterde alǵash ret «kásibı baǵdarlaýshy» laýazymy resmı bekitildi. 905 joǵary synyp oqýshysy jalpy bilim týraly attestatpen qatar, jumysshy biliktiligi boıynsha dıplom alady. 2,5 mln mektep oqýshysy kásibı baǵdarlaýshy sharalarymen qamtyldy. 104 kolledjdiń materıaldyq-tehnıkalyq bazasy jańartyldy. Stýdentterdiń turmys jaǵdaıyn jaqsartý úshin 2 myń orynǵa arnalǵan 8 jataqhana paıdalanýǵa berildi. Bıznes ókilderi 8 myńnan astam bilim berý baǵdarlamalaryn ázirleýge qatysty, - dep tolyqtyrdy vedomstvo basshysy.
Aıta keteıik, jazǵy kanıkýlda oqýshylar men stýdentter jumys isteı alady.