Byltyr kıberqylmystan azamattarǵa 21 mlrd teńge shyǵyn keldi
ASTANA. KAZINFORM – Keıingi 7 jylda Qazaqstanda ınternet-alaıaqtyq 10 eseden astam ósti. Bul týraly Parlament Májilisinde ótken talqylaýda Іshki ister mınıstriniń orynbasary Aıdos Rysbaev aıtty.
«Elimizdegi barlyq kıberqylmystyń 90 paıyzyn ınternet-alaıaqtyq qurap otyr. Qazir osy qylmpystar barsha álemde keńinen taralǵan, sonyń ishinde aqparattyq tehnologııalar salasynda damyǵan elder de qylmystyń bul túrinen zardap shegip jatyr. Keıingi 7 jylda Qazaqstanda osy qylmystar 10 eseden astam ósti. Mundaı qylmystar byltyr tirkelgen qylmystardyń jalpy sanynyń 19 paıyzyn, alaıaqtyq qylmystarynyń 50 paıyzyn qurady. Atap aıtqanda, byltyr azamattarǵa keltirilgen shyǵyn 21 mıllıard teńgege jetti», — dedi A. Rysbaev.
Onyń aıtýynsha, osy jyly 3645 ınternet-alaıaqtyq tirkeldi. Bul kórsetkish jalpy qylmys sanynyń 18 paıyzyn jáne barlyq alaıaqtyqtyń 43 paıyzyn qurady.
«Qabyldanǵan sharalardyń arqasynda 4 myń ınternet alaıaqtyq qylmysyna qatysy bar 2 myńǵa jýyq adam ustalyp, jaýapkershilikke tartyldy. Zardap shekkenderge 850 mıllıon teńge kóleminde shyǵyn óteldi», — dedi mınıstrdiń orynbasary.
Onyń sózine qaraǵanda, negizinen mundaı qylmystar shetelden nemese sheteldik ınternet resýrstardy paıdalaný arqyly jasalady. Bul rette qylmystkerler barynsha ózderiniń turǵylyqty jerin jasyrýǵa tyrysady.
«Hakerler ózderiniń anonımdiligin qamtamasyz etý úshin kóbine shet elderdiń azamattaryn tańdaıdy. Máselen, 2023 jyldyń sońynda Qazaqstanda 4 alaıaqtyq Call-ortalyǵy anyqtaldy. Olardyń qyzmetkerleri tek sheteldik nómirlerge habarlasqan», — dedi Aıdos Rysbaev.
