Byltyr Qazaqstannan Ózbekstanǵa 800 mln dollarǵa jýyq aqsha aýdarylǵan

TAShKENT. KAZINFORM — Byltyr Ózbekstanǵa shet elderden túsken aqsha aýdarymdarynyń kólemi 2023 jylmen salystyrǵanda 30%-ǵa artyp, 14,8 mlrd dollarǵa teńeldi, dep habarlaıdy Kazinform agenttiginiń menshikti tilshisi.

Ózbekstan Ortalyq bankiniń málimetinshe, qarajattyń basym bóligi, ıaǵnı 11,5 mlrd dollar Reseıden túsken. Bul 2023 jylmen salystyrǵanda 29%-ǵa kóp.

Qalǵan aqshany Qazaqstan ($795 mln), AQSh ($577 mln), Ońtústik Koreıa ($534 mln), Túrkııa ($405 mln), Ulybrıtanııa ($135 mln) jáne ózge de memleketterde jumys istep júrgen ózbekstandyqtar aýdarǵan.

— Aýdarymdar kóleminiń ósýine ekonomıkalyq jaǵdaıdyń jaqsarýy, shet elderde jumys kúshine suranystyń artýy jáne joǵary jalaqy yqpal etti, — delingen Ózbekstan Ortalyq bankiniń esebinde.

Eske salaıyq, bıyl Ózbekstan úkimeti 5,2 mln adamdy jumyspen qamtýdy josparlap otyr.

Sondaı-aq, kórshi el bıligi ústimizdegi jyly eksport kólemin 30 mlrd dollardan asyrýǵa nıetti.

Qosa ketsek, byltyr Ózbekstannyń jalpy ishki ónim kólemi 115 mlrd dollarǵa jetti.