Byltyr qazaqstandyqtardyń 12,3% ǵana shetelge saıahattaǵan – statıstıka

ASTANA. KAZINFORM – Byltyr elimizde 11 000 287 adam saıahattaǵan, onyń 9 903,5 adam (87,7%) el ishinde saıahattaǵan jáne 1 383,4 adam (12,3%) shetelge saparlaǵan. Bul týraly Ulttyq statıstıka bıýrosy habarlaıdy.

Negizinen qazaqstandyqtar jeke maqsatpen saparlaǵan (10 532,8 adam nemese 93,3%), al iskerlik jáne kásibı maqsatta 754,2 adam (6,7%) sapar shekken. 

El ishinde otandastarymyz kóbine Astana (10,5%), Almaty (10,2%) qalasy, sondaı-aq Túrkistan (8,8%), Qaraǵandy (7,9%) jáne Almaty (7,4%) oblysyna jol tartady. 

Qazaqstan boıynsha saparlaý kezinde týrısterdiń kópshiligi jatyn orny tegin bolatyndyqtan týystary nemese tanystaryna (64,2%) barýdy jón kórgen. Qonaq úılerde (15,2%), jaldamaly turǵyn úılerde (11,6%) jáne shıpajaılarda (3,3%) toqtaǵandardyń úlesi az.

Qatynas quralyna kelsek, el ishinde saparlaǵandar óz avtokóligimen (36,1%) jáne poıyzben kóbirek qozǵalǵan (26,4%), al shet elge barýshylar áýe kóligin (55,7%) jón kórgen. 
2024 jyly qazaqstandyqtar týrıstik saparǵa 957,7 mlrd teńge jumsaǵan, al el ishinde saparlaǵan otandastarymyz 582,7 mlrd teńge (60,8%) jumsaǵan. Shyǵyndar kóbine taýarlardy satyp alýǵa (29,5%), kólik qyzmetterine (25,2%), tamaqtanýǵa (21,0%) jáne ornalastyrý oryndarynda turý (12,6%) qyzmetterine ketken.

Eske salaıyq, Qazaqstan 2025 jyly saıahattaýǵa tıis úzdik elderdiń tizimine endi. 
Aıta ketsek, jyl basynda belgili bolǵandaı Almaty saıahattaýǵa turarlyq eń úzdik oryndar tizimine endi.