Byltyr qazaqstandyq avıakompanııalar júk tasymalynan qansha tabys tapty

ASTANA. Kazinform – Ótken jyly qazaqstandyq avıakompanııalar áýe kóligimen tasymaldaǵan júk kólemi 17% ósken. Bul týraly Kólik mınıstrliginiń Kazinform agenttiginiń resmı saýalyna joldaǵan jaýapta aıtylǵan.  

— Qazaqstandyq avıakompanııalar áýe kóligimen tasymaldaǵan júk kólemi boıynsha ósim baıqalady. Qazaqstan Respýblıkasy Ulttyq statıstıka bıýrosynyń resmı derekterine sáıkes, 2024 jyly áýe kóligimen tasymaldanǵan júktiń kólemi 27,9 myń tonna boldy, bul 2023 jyldyń osy kezeńimen salystyrǵanda 17%-ǵa artyq (23,8 myń tonna) jáne júk tasymalynan túsken kiris 15 501,7 mln teńge boldy, bul 2023 jyldyń osy kezeńimen salystyrǵanda 17%-ǵa artyq (13 219,6 mln teńge), - delingen habarlamada. 

Buǵan deıin Kólik mınıstrligi Qazaeronavıgatsııa Qazaqstan aspanynan qansha tabys taýyp otyrǵanyn málimdegen edi. 

— Sońǵy 10 jylda «Qazaeronavıgatsııa» RMK memlekettik bıýdjetke 67 mlrd 494 mln 940 myń teńge aýdarǵan. Al sońǵy 5 jylda 39 mlrd 686 mln 86 myń teńge aýdardy. 2023 jyly «Qazaeronavıgatsııa» RMK memlekettik bıýdjetke 38 mlrd 636 mln 459 myń teńge aýdarǵanyn atap ótemiz. Sońǵy 10 jyldaǵy «Qazaeronavıgatsııa» RMK-nyń Qazaqstan Respýblıkasynyń áýe keńistiginde áýe qozǵalysyna aeronavıgatsııalyq qyzmet kórsetý boıynsha túsken tabysy - 870 mlrd 127 mln 389 myń teńge, - dep jazylǵan jaýapta.

Aıta keteıik, buǵan deıin Nurtóre Júsip óziniń depýtattyq saýalynda Úkimetke azamattyq avıatsııanyń negizgi problemalaryn atap kórsetken edi.