Byltyr Qazaqstan men Reseı arasyndaǵy saýda kólemi 28 mlrd dollarǵa jetti – Prezıdent
ASTANA. KAZINFORM – Qasym-Jomart Toqaev ekinshi «Ortalyq Azııa – Reseı» sammıtinde sóılegen sózinde Qazaqstan men Reseı arasyndaǵy saýda kólemi týraly aıtty. Bul týraly Aqordanyń baspasóz qyzmeti habarlady.
Prezıdent aımaq pen Reseı arasyndaǵy ekijaqty jáne kópjaqty yqpaldastyqtyń birqatar ózekti baǵytyna qatysty oıymen bólisti. Birinshi basymdyq retinde saýda jáne ındýstrıaldy qarym-qatynasty damytýǵa toqtaldy.
– Alǵashqy sammıtte ekonomıkalyq yntymaqtastyqtyń jańa úlgisin qalyptastyrý baǵytynda jumys isteýge kelisken edik. Búgin qabyldanatyn Birlesken is-qımyl jospary 50-den asa sharany qamtıdy. Bul – óte qundy qujat. Sol sebepti ony ýaqtyly iske asyrýǵa barynsha kúsh jumyldyrý qajet. Ortalyq Azııa elderiniń Reseımen saýda kólemi barlyq taýar aınalymynyń úshten birin quraıdy. Ótken jyldyń qorytyndysy boıynsha bul kórsetkish 20 paıyz ósip, 50 mıllıard dollardan asty. Atalǵan kólemniń jartysynan kóbi Qazaqstan men Reseı arasyndaǵy saýdaǵa tıesili. Byltyr onyń kólemi 28 mıllıard dollarǵa jetti. Reseı Qazaqstan ekonomıkasyna qarjy quıǵan iri ınvestorlardyń qataryna endi. Investıtsııa kólemi 26 mıllıard dollardan asty. Byltyrdyń ózinde Reseıden tikeleı keletin ınvestıtsııa aǵyny 33 paıyz ulǵaıyp, 4 mıllıardtan asa dollarǵa kóbeıgen. Oǵan ónerkásip kooperatsııasyn jedel damytý múmkindik berdi. Jalpy quny 21 mıllıard dollardy quraıtyn 114 ınvestıtsııalyq joba júzege asyryldy. Qazirgi ýaqytta 33 joba boıynsha jumys júrip jatyr. Onyń ınvestıtsııa kólemi 4,5 mıllıardtan astam dollardy quraıdy, – dedi Memleket basshysy.
Qasym-Jomart Toqaevtyń aıtýynsha, taraptar saýda kedergilerin joıýdy, ózara saýdany jandandyrýdy jáne taýar aınalymy nomenklatýrasyn keńeıtýdi qoldaıdy.
– Shekaralyq saýda aımaǵyn qurý, turaqty túrde shekaralyq aımaqtyq forýmdar, bıznes-forýmdar, kórmeler men jármeńkeler ótkizý, elektrondyq saýda alańyn damytý bul mindetterdi sheshýge yqpal etedi. Qazirgi ýaqytta Ortalyq Azııada birlesken saýda-ónerkásip aımaqtary men ındýstrıaldyq habtar qalyptasa bastady. Bul alańdarda óndiris lokalızatsııasyna, qosylǵan qunnyń barlyq tizbegi boıynsha kooperatsııaǵa jáne turaqty tasymaldy qamtamasyz etýge jaǵdaı jasalady. Reseılik bıznestiń atalǵan jobalarǵa qatysýy Reseı taýarlarynyń bizdiń, sonyń ishinde Qazaqstan naryǵynda uzaq ýaqyt boıy aınalymda bolýyna yqpal etedi, – dedi Prezıdent.