Byltyr Qazaqstan men Ózbekstan arasyndaǵy taýar aınalymy 4,2 mlrd dollardan asty

TAShKENT. KAZINFORM — 2024 jyldyń qorytyndysy boıynsha Qazaqstan Ózbekstannyń negizgi saýda seriktesteriniń úshtiginde qaldy, dep habarlaıdy Kazinform agenttiginiń menshikti tilshisi.

Ózbekstan Statıstıka agenttiginiń aqparatyna saı, qańtar-jeltoqsan aralyǵynda eldiń syrtqy saýda aınalymy $65,9 mlrd dollarǵa jetip, byltyrǵy kezeńmen salystyrǵanda 3,8%-ǵa ósti. Búgingi tańda kórshiles memleket álemniń 198 elimen saýda-sattyq jasaıdy.

2024 jyldyń qorytyndysy boıynsha eldiń basty saýda seriktesteri kóshin Qytaı bastap tur. Eki memleket arasyndaǵy taýar aınalymy 12,4 mlrd dollardan (jalpy kólemniń 18,9%) asty.

Odan keıingi orynda saýda-sattyqtyń 17,6% úlesi tıesili Reseı tur. Bul elmen aradaǵy ımport-eksport kólemi 11,6 mlrd dollar boldy.

Sonymen qatar, kóshbasshylardyń úshtigin Qazaqstan túıindedi. Bizdiń el men Ózbekstan arasyndaǵy taýar aınalymy 4,22 mlrd dollardan (6,5%) asty.

Qamtylyp otyrǵan kezeńde Ózbekstan Qazaqstanǵa 1,4 mlrd dollardyń taýaryn eksporttap, 2,8 mlrd dollardan astam somaǵa taýar ımporttaǵan.

Eske salaıyq, byltyr Qazaqstannan Ózbekstanǵa 800 mln dollarǵa jýyq aqsha aýdarylǵan.

Buǵan deıin habarlaǵanymyzdaı, Ózbekstanda qazaqstandyq kapıtalmen myńnan astam kásiporyn jumys isteıdi. Bul rette resmı Astana men Tashkent arasyndaǵy óńiraralyq baılanys nyǵaıyp keledi.

Sonymen qatar, Qazaqstan men Ózbekstandy baılanystyratyn jańa temirjol jelisi salynyp jatyr.