Byltyr Qazaqstan áýejaılarynda 21,1 mln jolaýshyǵa qyzmet kórsetildi

Premer-Mınıstrdiń birinshi orynbasary Roman Sklıar ortalyq jáne jergilikti atqarýshy organdarmen el áýejaılarynyń qyzmetin damytý máseleleri boıynsha keńes ótkizdi, dep habarlaıdy Kazinform agenttigi.

Búgingi tańda azamattyq avıatsııa salasynyń negizgi kórsetkishteri turaqty ósimdi kórsetip otyr.

2022 jyldyń qorytyndysy boıynsha áýejaılarda 21,1 mln jolaýshyǵa qyzmet kórsetildi, bul 2021 jylmen salystyrǵanda (18,2 mln adam) 16%-ǵa artyq.

Ósý qarqyny bıyl da saqtalyp otyr.

Keńes barysynda ınfraqurylymdy damytý, áýejaılarǵa ınvestıtsııa tartý máseleleri qaraldy.

Jeke ınvestıtsııalar esebinen Almaty, Shymkent, Qyzylorda qalalarynyń áýejaılarynda jańa jolaýshylar termınaldaryn salý boıynsha iri jobalardy iske asyrý jumystary jalǵasýda. Qurylys kelesi jyly aıaqtalady dep josparlanǵan.

Basqosýda memlekettik organdarǵa keńes barysynda aıtylǵan máselelerdi kezeń-kezeńimen sheshý boıynsha birqatar tapsyrmalar berildi.