Byltyr Kaspıı qubyr konsortsıýmy 63,5 mln tonna munaı tasymaldady
ASTANA. KAZINFORM – Ótken jyly Kaspıı qubyr konsortsıýmy 63,5 mln tonna munaı jetkizdi. Onyń kóbi elimizdiń óndirýshilerinen kelip túsken. Bul týraly Kaspıı qubyr konsortsıýmynyń bas dırektory Nıkolaı Gorban málim etti.
«2023 jyly rekordtyq kólemde — 63,5 mln tonna munaı jetkizildi. Onyń ishinde 56 mln tonnasy — Qazaqstannan. Erekshe aıtyp ótetin sátterdiń biri — jyldy oıdaǵydaı aıaqtadyq, jazataıym oqıǵalar bolǵan joq», — dedi Nıkolaı Gorban ortalyq kommýnıkatsııalar qyzmeti alańynda ótken baspasóz máslıhatynda.
Sonymen qatar konsortsıým basshysy aldaǵy josparyn bólisti.
«Qubyr júıesin jańǵyrtý jáne jetildirý jumysy jalǵasyp jatyr. Aldaǵy birneshe jyl ishinde magıstraldy munaı qubyrynyń 400 kılometrge jýyq jelilik bóligin almastyrý josparda bar. Ótken jyly jeltoqsanda jelilik bóliktiń alǵashqy 25 shaqyrymy almastyrylǵan bolatyn. 2026 jyly 2001 jyldan beri jumys istep kele jatqan munaı shyǵarylatyn 2 aılaq qurylǵysyn jańalaımyz», — dedi ol.
