Byltyr IT-qyzmetter eksporty 1 mlrd dollardan asty — Oljas Bektenov
ASTANA. KAZINFORM — Pavlodar oblysyndaǵy «Derekterdi óńdeý ortalyqtary alqaby» jobasyna ınvestorlardy tartý jumysyn jandandyrý qajet. Bul týraly Úkimet otyrysynda Premer-mınıstr Oljas Bektenov málim etti.
— Memleket basshysy Alem.ai battle jáne AI Governance Cup baıqaýlarynyń jeńimpazdaryn marapattaý rásiminde jappaı tsıfrlandyrý men jasandy ıntellektini engizý elimizdi jan-jaqty jańǵyrtýdyń negizgi faktorlarynyń biri ekenin atap ótti. Ótken jyldyń qorytyndysy boıynsha biz IT-qyzmetter eksportyn 1 mıllıard dollardan astam deńgeıge jetkizdik. Osy qarqyndy saqtap qalý úshin bar kúsh-jigerdi jumyldyrý qajet. Halyqaralyq sarapshylardyń baǵalaýynsha, 2030-shy jylǵa qaraı jasandy ıntellektiniń álemdik ekonomıkaǵa qosatyn úlesi 22 trıllıon dollardan asady. IT-sala erekshe qarqynmen damyp keledi, sondyqtan jahandyq aýqymdaǵy tsıfrlyq básekege qabiletti bolý úshin jumyla jumys isteý kerek, — dedi Oljas Bektenov.
Onyń aıtýynsha, elimizdiń kásiporyndarynda tsıfrlyq tehnologııalardy engizý ónimniń sapasyn, eńbek qaýipsizdigi men ónimdiligin arttyrýǵa múmkindik beredi. Jasandy ıntellektini tıimdi paıdalaný úshin ınfraqurylymnyń damý deńgeıi mańyzdy ról atqarady.
— Elimizde Alem.Cloud jáne AL Farabium — óńirdegi eń iri sýperkompıýter klasterleri ornalasqan. Olar jahandyq TOP-500 reıtıngine kiredi. Memlekettik organdar men bıznes tarapynan jasandy ıntellekt sheshimderin ázirleý úshin sýperkompıýterdiń esepteý qýattaryn bólýge qatysty ótinishter sany artty. Bul qoldanystaǵy kólemderdi ulǵaıtý jáne osyndaı resýrstardy bólýdiń ıkemdi saıasatyn ázirleý qajettigin kórsetedi. Jasandy ıntellekt mınıstrligi esepteý qýatynyń shekteýli bolýy tejeýshi faktorǵa aınalyp ketpeýi úshin tıisti sharalar qabyldaý kerek. Qazirgi tańda Pavlodar oblysynda «Derekterdi óńdeý ortalyqtary alqaby» jobasy júzege asyrylyp jatyr. Atalǵan jobaǵa ınvestorlardy tartý jumysyn jandandyrý qajet. Jasandy ıntellekt mınıstrligi eki apta ishinde Qazaqstan aýmaǵynda bultty provaıderlerdiń qyzmetin retteý men onyń damýyn yntalandyrýǵa arnalǵan zańnamalyq túzetýler ázirleýge tıis, — dedi Úkimet basshysy.
Budan buryn habarlanǵandaı, Premer-mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıev birqatar salaǵa jasandy ıntellekti qalaı engizilip jatqanyn túsindirdi.
