Byltyr Eýropalyq Odaqtaǵy mıgranttar sany rekordqa jetken
ASTANA. KAZINFORM — 2025 jyly Eýropalyq Odaq aýmaǵynda turatyn mıgranttar sany rekordtyq 64 mln adamǵa jetti. Bul týraly BELTA The ROCKWOOL Foundation qorynyń esebine silteme jasap habarlady.
— EO-da shetelde týǵan adamdardyń sany rekordtyq deńgeıge jetip, 2025 jyly shamamen 64 mln adamdy qurady, — delingen esepte.
Jarııalanymda qor mıgranttardy týǵan elinen basqa elde turatyn adamdar retinde anyqtaıtyny naqtylanady.
Esepte 2010 jyly mıgranttar sany 40 mln bolǵany, ıaǵnı 15 jyl ishinde 60%-ǵa óskeni kórsetilgen. 2024–2025 jyldar aralyǵynda Eýropalyq Odaqtaǵy mıgranttar sany shamamen 2,1 mln adamǵa artqan. Alǵashqy iri ósim 2015 jylǵy daǵdarys kezinde baıqaldy, sol kezde 1,25 mln-nan astam adam EO-dan baspana surady.
Qor málimetinshe, mıgranttardyń negizgi baǵyty — Germanııa. 2010 jyldan beri olardyń sany shamamen 70%-ǵa artqan. Frantsııa men Ispanııa da turaqty ósim kórsetken. EO-nyń basqa múshe elderinde de ósý úrdisi baıqalady.
Halqy az memleketterde mıgranttardyń úlesi halyq sanyna shaqqanda eń joǵary. Atap aıtqanda, Lıýksembýrgte mıgranttar halyqtyń shamamen 52%-yn quraıdy, odan keıin Malta (32%) jáne Kıpr (28%).
Bosqyndarǵa kelsek, eń kóp qabyldaıtyn el — Germanııa, shamamen 2,7 mln adam, bul ekinshi orynda turǵan Polshadaǵy (shamamen 1 mln) kórsetkishten eki eseden asa kóp. Odan keıin Frantsııa, Ispanııa jáne Chehııa keledi.
Bul derekter Eýropada kóshi-qon qarqynynyń aıtarlyqtaı kúsheıgenin kórsetedi. Sońǵy jyldary mıgranttar sanynyń ósýi ekonomıkalyq, saıası jáne gýmanıtarlyq faktorlarmen baılanysty.
Aıta keteıik, buǵan deıin BUU 8 myńǵa jýyq zańsyz mıgrant qaza tapqanyn málimdegen edi.
