Byltyr eńbekaqy bermegen kásiporyndar qandaı jaýapkershilikke tartyldy

ASTANA. KAZINFORM – Eńbek jáne halyqty áleýmettik qorǵaý mınıstrligi byltyr jalaqy boıynsha bereshegi bar kásiporyndarǵa qatysty túsinik berdi.

- 2025 jyly memlekettik eńbek ınspektorlary respýblıkanyń 629 kásipornynda 11,9 myńnan astam jumysshyǵa jalaqy boıynsha 3,1 mlrd teńgeden astam somaǵa bereshek baryn anyqtady. Sonymen birge túrli uıymdarda júrgizilgen tekserýler barysynda eńbek quqyǵy buzylýynyń 8,7 myńnan astam deregi anyqtaldy, - delingen mınıstrliktiń Kazinform agenttigine bergen jaýabynda.

Jalaqy boıynsha bereshegi jáne eńbek quqyǵynyń buzylýy anyqtalǵan kásiporyndardyń basshylaryna oryndaýǵa mindetti 4 245 uıǵarym berildi jáne 524,3 mln teńgeden astam somaǵa aıyppul salyndy. Qabyldanǵan sharalardyń, onyń ishinde jalaqy boıynsha bereshekti óteýdiń qatań kesteleri men merzimderin belgileýdiń nátıjesinde 11,8 myń jumysshynyń quqyqtary qorǵaldy. Olarǵa 2,85 mlrd teńge tólendi.

- 2025 jyldyń qorytyndysy boıynsha memlekettik eńbek ınspektorlary 6 599 tekserý júrgizdi. Onyń barysynda 8 720 zańnama talabyn buzý deregi anyqtaldy. Sonyń arasynda: eńbek salasynda – 7 089, eńbek qaýipsizdigi jáne eńbekti qorǵaý boıynsha – 1 585, al halyqty jumyspen qamtý boıynsha – 46. Qabyldanǵan sharalardyń nátıjesinde 62,8 myń jumysshynyń eńbek quqyǵy qorǵaldy, - dep naqtylady vedomstvo.

Aıta keteıik, elektrondyq eńbek bırjasynda ótken jyly jumys kúshine suranys usynystan asyp tústi.