Byltyr elimizde jalpy ishki ónimniń ósimi 5%-dy qurady

ASTANA. KAZINFORM – Naqtylanǵan derekter boıynsha 2024 jyly JІÓ naqty kólem ındeksi 105%-dy qurady. Óndirilgen jalpy ishki ónimniń kólemi – 136,6 trln teńge. 

Ulttyq statıstıka bıýrosynyń dereginshe, JІÓ qurylymynda taýarlar óndirisiniń úlesi – 35,9%, qyzmetterdiki – 58%. JІÓ óndirisindegi negizgi úles ónerkásip salasyna tıesili – 26,1%.

Eń joǵary ósim qurylys (15,3%), aýyl sharýashylyǵy, orman jáne balyq sharýashylyǵy (13,7%), kólik jáne qoıma (9,4%), kóterme jáne bólshek saýda; avtomobılder men mototsıklderdi jóndeý (8,9%), óńdeý ónerkásibi (6,8%) salalary kórsetti.

Jan basyna shaqqandaǵy JІÓ 2024 jyly 14 444,6 AQSh dollaryn qurady. 

Dınamıkada baqylanbaıtyn ekonomıka úlesi 2020 jylǵy 20,2%-ten 2024 jyly 16,7%-ke deıin tómendegen, onyń ishinde zańsyz qyzmet úlesi JІÓ-niń 1,18%-yn qurady. 

Aıta keteıik, JІÓ – naryq baǵasyndaǵy óndirýshi-rezıdentterdiń óndiristik qyzmetiniń túpkilikti nátıjesi. JІÓ-niń naqty kólem ındeksi belgili bir kezeńdegi ekonomıkadaǵy taýarlar men qyzmetter óndirisi kóleminiń ózgerisin sıpattaıdy. 

Eske salsaq, budan buryn bıylǵy qańtar-mamyr aralyǵynda Qazaqstannyń JІÓ ósimi 6%-ǵa artqanyn jazǵan edik.