Byltyr elimizde qansha esirtki qylmysynyń joly kesildi
ASTANA. KAZINFORM – QR Іshki ister mınıstrliginiń Esirtki qylmysyna qarsy is-qımyl komıtetiniń tóraǵasy Danııar Meırhan Ortalyq kommýnıkatsııalar qyzmetiniń baspasóz alańynda jańa Keshendi jospardyń tanystyrylymy barysynda málimdeme jasady.
Onyń aıtýynsha, jańa Keshendi jospardy ázirleý kezinde jahandyq jáne óńirlik deńgeıdegi esirtkige qatysty ahýaldyń damý úrdisteri jan-jaqty taldanǵan. Sonymen qatar Parlament depýtattarynyń, memlekettik jáne jergilikti atqarýshy organdardyń, úkimettik emes uıymdar men qoǵam ókilderiniń usynystary eskerilgen. Budan bólek, 2023–2025 jyldarǵa arnalǵan aldyńǵy Keshendi jospardyń iske asyrylý nátıjeleri de nazarǵa alynǵan.
– Keıingi úsh jylda vedomstvoaralyq ózara is-qımyl men halyqaralyq yntymaqtastyq aıtarlyqtaı kúsheıip, esirtki qylmysyna qarsy kúres aldyn alý sharalaryna basymdyq berilgen neǵurlym belsendi sıpatqa ıe bolǵan, - dedi ol.
Sondaı-aq ol óz sózinde 2025 jyly barlyq quqyq qorǵaý jáne arnaıy memlekettik organdardyń birlesken jumysynyń nátıjesinde 4 myń esirtki qylmysynyń joly kesilgen. Onyń ishinde 2 700-den astamy esirtki zattaryn satý derekteri ekenin atap ótti.
– Jalpy alǵanda, zańsyz aınalymnan shamamen 49 tonna túrli esirtki zattary tárkilengen. Ásirese sıntetıkalyq esirtkige qatysty oń nátıjeler baıqalady. Atalǵan baǵyt boıynsha alynǵan esirtkiniń kólemi 1,5 tonnaǵa jýyqtap, bul 4,5 mıllıon bir rettik dozanyń zańsyz aınalymǵa túsýine jol bermegen, - dedi Danııar Meırhan.
Sonymen qatar jedel-izdestirý jumystarynyń jańa tásilderi men keshendi ınnovatsııalyq sheshimderdi qoldaný nátıjesinde birqatar narkolaboratorııalar joıylǵan. Olardyń basym bóligi sıntetıkalyq esirtki óndirýmen aınalysqan.
Buǵan deıin Almatyda polıtsııa iri kólemdegi esirtki satý arnasynyń jolyn keskenin jazǵanbyz.