Byltyr elimizde 249 áıel jumysta zardap shegip, 9-y qaıtys bolǵan
ASTANA. KAZINFORM – Ótken jyly elimizde 249 áıel jumysta zardap shegip, onyń 9-y qaıtys boldy. Bul týraly Qazaqstannyń Kásipodaqtar federatsııanyń tóraǵasy Satybaldy Dáýletalın málim etti.
«Jumys isteıtin áıelderdiń eńbekti qorǵaý jaǵdaıy qatty alańdatady. 2023 jyly 249 jumysshy zardap shekti, onyń ishinde 9 áıel qaıtys boldy. 673 myń áıel zııandy jáne basqa da qolaısyz eńbek jaǵdaılarynda jumys isteıdi. Onyń ishinde 88 myń áıel sanıtarlyq-gıgıenalyq talaptarǵa saı kelmeıtin jaǵdaılarda, 23 myńy shý men dirildiń joǵary deńgeıinde, 17 myńy shań pen gazdyń joǵary kórsetkish jaǵdaıynda eńbek etedi. Osy oraıda bizdiń ustanymymyz, eńbek adamdy óltirip nemese múgedek etpeýi kerek jáne adamnyń densaýlyǵyna zııan tıgizbeýi tıis», - dedi Satybaldy Dáýletalın elordada ótip jatqan Qazaqstan eńbekshi áıelderiniń І forýmynda.
Sondaı-aq, federatsııa tóraǵasy eńbek salasyndaǵy adamdardy kemsitýshilik pen zorlyq-zombylyq máselelerin qozǵady.
«Búkil álemde eńbek salasyndaǵy ózekti máselelerdiń biri – jumys ornynda kemsitýshilik pen zorlyq-zombylyqtan qorǵaýdy qamtamasyz etý. Qazaqstandyq qoǵamda bul problema da bar. Saýalnamaǵa qatysqandardyń 8,9%-y jıi jáne keıde atalǵan jaǵdaıǵa tap bolǵandaryn aıtty. Eńbek álemindegi genderlik saıasat, zorlyq-zombylyq pen qýdalaýǵa qarsy kúres kásipodaqtyń basty mindeti», - deıdi ol.
Buǵan Qazaqstan Kásipodaqtar federatsııasy sý tasqynynan zardap shekkenderge shıpajaılardan 186 oryn bólgeni týraly habarlaǵan edik.
Aıta keteıik, búgin Astanada «Eńbek salasyndaǵy áıelder: Jańa sheshimder ýaqyty» atty Qazaqstan eńbekshi áıelderiniń І forýmy ótip jatyr. Sharany Qazaqstannyń kásipodaqtar federatsııasy uıymdastyrýda, oǵan Halyqaralyq eńbek uıymy, BUU, Májilis depýtattary, Eńbek jáne halyqty áleýmettik qorǵaý mınıstrliginiń ókilderi jáne eńbek áıelderi qatysýda.
