Byltyr elimizde 171 400 avtokólik shyǵaryldy
ASTANA. KAZINFORM — Úkimet otyrysynda Ónerkásip jáne qurylys mınıstri Ersaıyn Naǵaspaev avtokólik óndirisiniń damý barysy jóninde málimdedi.
— Qazir avtomobıl ónerkásibi — otandyq mashına jasaý salasyndaǵy strategııalyq baǵyttardyń biri. Ol álemniń damyǵan memleketter tájirıbesine sáıkes kezeń-kezeńimen damyp keledi. Máselen, Koreıada bul salany qalyptastyrýǵa shamamen 30 jyl qajet boldy. Elimizde 2010-2019 jyldary otandyq avtokólik óndirisiniń negizi qalandy. Osy kezeńde naryqqa álemdik jetekshi brendter kelip, qurastyrý óndirisi iske qosyldy. Sonyń nátıjesinde avtomobıl óndirisiniń kólemi 3 myńnan 50 myń birlikke deıin ósti, — dedi ol.
Al 2020 jyldan bastap sala damýdyń jańa kezeńine ótti.
— Dánekerleý, boıaý protsesterin qamtıtyn kúrdeli qurastyrý óndirisi engizile bastady. Sonyń nátıjesinde óndiris áleýeti artyp, jyl qorytyndysy boıynsha 171 400 avtokólik shyǵaryldy. Ótken jyldan bastap avtomobıl ónerkásibiniń damýynyń jańa kezeńi bastaldy, — dedi mınıstr.
Aıta keteıik, buǵan deıin Qazaqstanda eń kóp satylǵan avtokólikter belgili bolǵanyn jazǵanbyz.
