Byltyr elimiz 87,7 mln tonna munaı óndirdi
ASTANA. KAZINFORM – Ótken jyly elimizde otyn energetıka kesheninde ósim baıqaldy. Bul týraly Energetıka mınıstri Almasadam Sátqalıev málim etti.
- Otyn-energetıka kesheniniń negizgi kórsetkishteri boıynsha ótken jyldyń qorytyndysy boıynsha ósim baıqaldy. Onyń ishinde munaı óndirý 87,7 mln tonna, munaı óńdeý: 17,9 mln tonna, munaı ónimderin óndirý 14,5 mln tonna, gaz óndirý 59 mlrd tekshe metr, janar-jaǵarmaı óndirisi 3 mln tonna, munaı-gaz-hımııasy óndirisi 540 myń tonna, elektr energııa óndirisi saǵatyna 117,9 mlrd kVt-qa jáne saǵatyna jańartylǵan energııa óndirisi 7,58 mlrd kVt artty, - dedi Almasadam Sátqalıev vedomstvonyń keńeıtilgen alqa otyrysynda.
Osylaısha mınıstr ótken jylǵy otyn-energetıka kesheni salasynyń jumysyn «turaqty» dep baǵalady.
Sondaı-aq vedomstvo basshysy bıyl jergilikti jer qoınaýyn paıdalanýshylardyń memlekettik satyp alýdaǵy úlesin 62%-ǵa deıin ulǵaıtý josparda baryn aıtty.
- Jer qoınaýyn paıdalaný salasynda 345 kelisimshart bar, ótken jyly ótkizilgen aýktsıondardyń qorytyndysy boıynsha geologııalyq barlaýǵa salynǵan ınvestıtsııanyń jalpy kólemi $72,5 mln bolatyn 14 jer qoınaýy ýchaskesi satyldy. Byltyr jer qoınaýyn paıdalanýshylardyń satyp alýlaryndaǵy qazaqstandyq qamtý úlesi 61,9% (3,8 trln teńge). Sonymen qatar munaı-gaz salasyndaǵy 10 jańa óndiristi oqshaýlaý, keminde eki elektrondyq aýktsıon ótkizý jáne «Jer qoınaýy týraly» kodekske túzetýler engizýdi josparlap otyrmyz, - deıdi ol.
Aıta ketsek, iri munaı-gaz jobalarynda otandyq taýarlar men qyzmetterge qoldaý kórsetiledi.