Byltyr elimiz 2 mlrd dollarǵa hımııa ónimderin eksporttady

ASTANA. KAZINFORM – Ótken jyldyń qorytyndysy boıynsha hımııa ónerkásibinde óndiris kólemi 7,7% ulǵaısa, munaı-gaz hımııasynda ósim 50% joǵary boldy. Tolyǵyraq Úkimet basshysy Oljas Bektenov aıtyp berdi.

— Memleket basshysy ekonomıkany ártaraptandyrý jáne onyń básekege qabilettiligin arttyrý úshin hımııa, munaı hımııasy salalaryn damytýdyń strategııalyq mańyzyn atap kórsetti. Hımııa ónerkásibi aýyl sharýashylyǵy, taý-ken ónerkásibi, metallýrgııa jáne qurylys sııaqty basqa da salalardyń damýyn qamtamasyz etedi. Ótken jyldyń qorytyndysy boıynsha hımııa ónerkásibinde óndiris kólemi 7,7% ulǵaısa, munaı-gaz hımııasynda ósim 50% joǵary boldy. Hımııa ónimderiniń eksporty 2 mıllıard dollardan asty, bul kórsetkish 2023 jylmen salystyrǵanda 13% artyq, — dedi Oljas Bektenov Úkimet otyrysynda. 

Premer-mınıstr keltirgen málimetke sáıkes, bıyl І toqsanda atalǵan salada oń dınamıka saqtalyp otyr, ıaǵnı hımııa salasy 12,5% ósti. 

— Elimizde hımııa jáne munaı-gaz hımııasy sektorynda 12 iri kásiporyn jumys istep tur. Olar mıneraldy tyńaıtqyshtar, beıorganıkalyq jáne organıkalyq hımııalyq zattarmen qatar aýqymdy ónim spektrin shyǵarady. Atyraý oblysynda jumys istep turǵan polıpropılen zaýyty Ortalyq Azııada osy baǵyttaǵy eń iri kásiporyn. Byltyr jobanyń II kezeńi, ıaǵnı polıetılen óndirisi zaýytynyń qurylysy bastaldy, bul otandyq óńdeý ónerkásibindegi eń aýqymdy joba. Ol ımporttyq ónimderdi tolyq almastyryp, qosylǵan quny joǵary eksporttyń ósýin qamtamasyz etýi kerek. Zaýyttyń el ekonomıkasyna tıgizetin mýltıplıkatıvtik áseri zor bolýy tıis, — deıdi ol.

Sondaı-aq Úkimet basshysy Jambyl oblysynda natrıı tsıanıdi men ammonıı sýlfaty óndirisin keńeıtý jospary baryn aıtty. 

— Odan bólek, býtadıen, karbamıd, polıetılentereftalat óndirisi boıynsha perspektıvaly jobalar iske asyrylyp jatyr. Bul jobalar qosylǵan qun tizbegin qurýǵa úlken úles qosady, — dep tolyqtyrdy Oljas Bektenov.

Sondaı-aq Premer-mınıstr polıpropılen óndirisiniń jospardan tys toqtap qalýy alańdaýshylyq tanytty. 

Buǵan deıin habarlaǵanymyzdaı, elimizde munaı-gaz-hımııa ónerkásibi týraly zań jobasy ázirlenip jatyr. 

Úkimet otyrysynda belgili bolǵandaı elimizden hımııa óndirisi shıkizatynyń 45% eksportqa tereń óńdelmeı shyǵarylady.  

Aıta keteıik, elimizde munaı-gaz salasyn damytýdyń jol kartasy aıasynda 3,5 myń turaqty jumys orny ashylady.