Byltyr elge syrttan kelgenderdiń sany 15,3% artqan

ASTANA. KAZINFORM – 2024 jyly Qazaqstanǵa turaqty turýǵa 29 282 adam kelse, 12 732 adam elden ketken eken. Kóshi-qon saldosy 16 550 adam boldy. Osylaısha, qatarynan eki jyl boıy syrtqy kóshi-qonnyń oń saldosy baıqalyp keledi.

2023 jylmen salystyrǵanda Qazaqstanǵa kelgender sany 15,3% artty, al sytrqa kóship ketkender sany 20,9% azaıdy.

— Eldiń negizgi kóshi-qon almasýy TMD memleketterimen júrgen. Táýelsiz memleketter dostastyǵynan kelgenderdiń úlesi 81,6% bolsa, osy elderge ketkenderdiń úlesi 74,8%. Basqa elderdiń ishinde kóship kelgenderdiń kópshiligi Qytaıdan, Mońǵolııadan jáne Túrkııadan bolǵan, al basqa elge ketkenderdiń basym bóligi Germanııa, Polsha jáne AQSh-qa ketken, — delingen Ulttyq statıstıka bıýrosynyń habarlamasynda.

Shetelden turaqty turý úshin kelgender negizinen Almaty qalasyn (6 260 adam), sondaı-aq Almaty (4 788) jáne Mańǵystaý (3 680) oblystaryn tańdaǵan. Kerisinshe syrtqa ketkenderdiń eń kóp sany Soltústik Qazaqstan (2 133 adam), Qaraǵandy (1 588) jáne Shyǵys Qazaqstan (1 195) oblystarynda tirkelgen.

El ishinde kóship-qonýshylar sany 2023 jylmen salystyrǵanda 47,6% ósti. Óńiraralyq kóshi-qon boıynsha elimizdiń 4 óńirinde oń saldo qalyptasyp otyr, olar Astana (73 238 adam), Almaty (36 061 adam), Shymkent (9 361 adam) qalalary men Almaty oblysy (2639 adam).

Aıta ketelik kóshi-qon zańnamasyn buzǵan sheteldik azamattar elden shyǵarylǵandyǵy týraly jazǵan edik.