Byltyr el aýmaǵyna 2,5 mln «aıfon» zańsyz ákelingen

ASTANA. KAZINFORM – Tsıfrlyq damý, ınnovatsııalar jáne aeroǵarysh ónerkásibi mınıstriniń orynbasary Dosjan Musalıev mobıld baılanys quraldaryn tirkeý erejesin engizý ne úshin qajet bolǵanyn túsindirdi.

Onyń sózinshe, elge ákelinip jatqan mobıldi telefondardyń 75%-y zańsyz kirgiziledi.

- Bular salyq pen tıisti keden bajyn tólemeıdi. Osy naryqqa tolyq jaryq túsirý úshin osy tetikti oılap taptyq. Bizdegi derekterge súıensek, 2024 jyly elge 1,5 mıllıondaı Apple kompanııasynyń telefondary zań talabyna saı ákelingen, - dedi ol.

Aıtýynsha, zańsyz ákelinetin «aıfon» sany budan áldeqaıda kóp.

- Bul sandy kodtar týraly derekter bazasymen salystyryp qarasaq, el aýmaǵynda iske qosylǵan qurylǵy sany 4 mıllıonǵa jýyq. Sondyqtan kontrabandamen kúreske baǵyttalǵan ereje engizdik. Bul salyq túsimderin tıisti kólemde alýǵa jol ashady, - dedi Dosjan Musalıev.

Buǵan deıin AQSh Prezıdenti Donald Tramptyń jańa tarıf saıasaty aıfondardy qymbattatýy múmkin ekenin jazǵan edik.