Byltyr ekonomıkany nesıelendirý kólemi 51 trln teńgege jetken
ASTANA. KAZINFORM — «Báıterektiń» jobalyq keńsesiniń jumysy ońtaılandyrylady. Bul týraly Ulttyq bank tóraǵasy Tımýr Súleımenov Úkimettiń keńeıtilgen otyrysynda málim etti.
— Siz qol qoıǵan «Bankter týraly» jańa zań tehnologııalyq jáne anaǵurlym zamanaýı bank júıesin qurýǵa irgetas qalaıdy. Ekonomıkany nesıelendirýdiń jalpy dınamıkasy jaǵymdy — 21 paıyz, 51 trln teńgege deıin ósim bar. Naqty sektordy nesıelendirý ozyńqy qarqynmen ósip keledi. Fıskaldyq yntalandyrýdyń ınflıatsııaǵa áserin tómendetip, bıýdjetke qysymyn azaıtý úshin bıyl «Báıterek» qarjy baǵdarlamasyn birge iske asyrýdyń Úkimetpen kelisilgen tetigi qabyldanyp jatyr. Basymdyqtardy naqty aıqyndap, iri strategııalyq jobalarǵa ǵana kóńil bólip, naryqtaǵy ótimdilikti barynsha tartý mańyzdy dep oılaımyz, — dedi ol.
Tımýr Súleımenov bankterdiń jeke tulǵalarǵa kepilsiz nesıe berý «tábeti» báseńdeginen de aıtty.
— «Báıterektiń» jobalyq keńsesiniń ekinshi deńgeıli banktermen, qarjy retteýshilerimen jumysy tehnıkalyq turǵydan ońtaılandyrylady. Byltyr halyqtyń nesıe júktemesimen kúres jalǵasty. Sonyń áserin bankterdiń jeke tulǵalarǵa nesıe berý qarqyny aıtarlyqtaı báseńdegeninen kórip otyrmyz. Onyń ústine kepildiksiz beriletin tutyný kredıtteri odan da eleýli mólsherde tómendedi. Jalpy portfeldiń ósimi 2024 jyly 29,2 paıyz bolsa, 2025 jyly 14,6 paıyz boldy. Sonyń ishinde berilgen kredıtterdiń ósimi odan da báseńdedi — 2024 jyly 22,7 paıyz bolsa, 2025 jyly 6,3 paıyz boldy. Kepildikpen beriletin tutyný boryshyn berýdiń qarqyny 29, avtonesıelendirý qarqyny 30 paıyz bolyp, aıtarlyqtaı joǵary deńgeıde qalyp otyr. Sondyqtan Qarjy naryǵyn retteý jáne damytý agenttigimen birge osy nesıelerdiń sapasyna monıtorıng jasaı beremiz. Bıyl halyqqa teńgerimdelmegen nesıe berý qarqynyn tómendetý baǵytyndaǵy qosymsha sharalar qabyldaımyz, — dedi Ulttyq bank tóraǵasy.
Aıta keteıik, búgin Memleket basshysy Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr. Jıynda eldiń 2025 jylǵy áleýmettik-ekonomıkalyq damýy qorytyndylanyp, Úkimettiń aldaǵy kezeńge arnalǵan negizgi mindetteri aıqyndalady.