Ekibastuzdaǵy jylý jelileriniń jarylýyna jaýapty basshylar jazaǵa tartyldy
Bıylǵy 23 qarashada Pavlodar oblysy Ekibastuz qalalyq soty «Ekibastuzjylýenergo» JShS bas dırektory M.-ǵa, «Ekibastuz jylý elektr ortalyǵynyń» dırektory V.-ǵa jáne «Ekibastuz jylý jelileri» dırektory G.-ǵa qatysty aýyr zardaptarǵa ákep soqqan, qyzmetterine adal qaramaý saldarynan óz mindetterin tıisinshe oryndamaý faktisi boıynsha qylmystyq isti qarady, dep habarlaıdy Kazinform.
M., V. jáne G. Ekibastuz qalasynyń kommertsııalyq uıymdaryn basqara otyryp, 2022-2023 jyldarǵa jylý berý kezeńine daıyndyq jumystarynyń tolyqtyǵyn qamtamasyz etý boıynsha tıisti sharalar qabyldamaǵan.
«Sottalýshylardyń abaısyz kinási boıynsha óz mindetterine adal qaramaý nátıjesinde 2022 jylǵy 27 qarashada Ekibastuz qalasynda „Ekibastuzjylýenergo“ JShS jylý jelilerinde apat oryn aldy, bul aýyr zardaptarǵa jáne qalada tótenshe jaǵdaı rejımin engizýge ákep soqtyrdy.
Sottalýshylardyń kinási jaýap alynǵan kýálerdiń aıǵaqtarymen, sot saraptamalarynyń qorytyndylarymen jáne bas sot talqylaýy barysynda zerttelgen ózge de dáleldemeler jıyntyǵymen dáleldendi», — dep jazdy vedomstvodan.
Sot bul onsha aýyr emes qylmystar sanatyna jatatynyn jáne ony jasaǵany úshin zańda 5 jylǵa deıingi merzimge bas bostandyǵyn shekteý nemese bas bostandyǵynan aıyrý túrindegi jaza kózdelgenin eske saldy.
«Bul rette aýyrlatatyn mán-jaılardyń bolmaýyna jáne jeńildetetin mán-jaılardyń bolýyna baılanysty jaza mólsheri kórsetilgen merzimniń jartysynan, ıaǵnı 2 jyl 6 aıdan aspaýǵa tıis. Sottalýshylardyń jeke basy men otbasylyq jaǵdaıyn, olardyń aýyr zardaptardyń týyndaýyna abaısyz kinásin eskere otyryp, sot olarǵa probatsııalyq baqylaý belgilep, májbúrli eńbekke tarta otyryp, árqaısysyna 2 jyl 6 aı merzimge bas bostandyǵynan shekteý túrindegi jazany taǵaıyndady», — delingen habarlamada.
Sondaı-aq sottalǵandar kommertsııalyq uıymdarda 3 jyl merzimge basshylyq laýazymdardy atqarý quqyǵynan aıyryldy.
Úkim zańdy kúshine engen joq.
