Byltyr «dropperlerden» 1 mlrd teńge óndirip alyndy – Bas prokýratýra
ASTANA. KAZINFORM – 2024 jyly jalǵan bank qyzmetkerlerinen, quqyq qorǵaý jáne basqa organdardyń qyzmetkerlerinen, baılanys operatorlary men jaqyn týystardan kelip túsken 8 myńnan astam qońyraý tirkeldi.
Qaskúnemderdiń kóp jaǵdaıda shet memleketterden áreket etýine baılanysty halyqaralyq yntymaqtastyq kúsheıtildi.
- Sheteldik áriptesterdiń qoldaýymen Qazaqstannan tys jerde bizdiń eldiń azamattaryna qatysty áreket jasaǵan 8 jalǵan koll-ortalyqtary joıyldy, - delingen Bas prokýratýra habarlamasynda.
Basqa da sharalar kesheni qabyldanyp jatyr.
Ulttyq banktiń janynda alaıaqtyq tranzaktsııalardy buǵattaýǵa arnalǵan Antıfrod-ortalyǵy iske qosyldy. Ol jumys atqarǵan jarty jyl ishinde kúdikti operatsııalar boıynsha 1,5 mlrd tenge buǵattaldy.
Prokýratýranyń bastamasy boıynsha ákimdikterdiń qoldaýymen kıberqylmyskerlerdi anyqtaýǵa múmkindik beretin zamanaýı baǵdarlamalyq keshender alyndy.
Bul 2024 jyly 59 alaıaqtyq topty áshkereleýge jáne banktik aýdarymdar men jymqyrylǵan qarajatty qolma-qol aqshaǵa aınaldyrý qyzmetin kórsetken 128 azamatty qylmystyq jaýaptylyqqa tartýǵa septigin tıgizdi.
Tergeý organdary jábirlenýshilerge keltirilgen shyǵyndy azamattyq sot tártibinde «droptardan» óndirip alý jolyn (AK-niń 953-baby) túsindirýge baǵdarlanǵan.
- 2024 jyly 800 talap aryz boıynsha «dropperlerden» 1 mlrd teńge óndirip alyndy, - delingen habarlamada.
Prokýratýra jalǵan qońyraýlardy dereý buǵattaý maqsatynda kıberpolıtsııamen, «Qazaqtelekom» AQ-men jáne ózge baılanys operatorlarymen birlesip tıisti memorandým jasady.
- Atalǵan joba aıasynda 19 myńnan astam alaıaqtyq qońyraýlar buǵattalyp, ınternet-alaıaqtyqta qoldanylatyn 100 «SIM-boks» qurylǵylary anyqtaldy, kúdikti adamdar, onyń ishinde shetel azamattary ustap alyndy. Tergeý barysynda myńnan astam jábirlenýshilerdiń 1,5 mlrd teńgeden asa nesıelik bereshekterin óndirip alý ýaqytsha toqtatyldy, sondaı-aq qarjy uıymdary azamattardyń is júzinde qatysýynsyz resimdelgen nesıeler boıynsha 100 mıllıon tenge kólemindegi bereshekti esepten shyǵardy, - delingen Bas prokýratýra habarlamasynda.
Sondaı-aq, otyrysta adamdardy, ásirese jastardy basqa bireýdiń aqshasyn jylystatý shemalaryna tartý máseleleri talqylandy.
Qorytyndysy boıynsha birqatar usynym ázirlendi.
Eske salsaq mıkroqarjylyq uıymdar men baılanys operatorlaryna qatysty 71 qylmystyq is qozǵalǵan edi.