Byltyr dıqandar 300 mlrd teńge shyǵynǵa ushyrady, jańa Úkimet osy máseleni sheshedi dep úmittenemiz — «Aýyl»
ASTANA. KAZINORM — Jańa Úkimet agroónerkásip kesheniniń problemalyq máselelerin sheshedi dep úmittenemiz. Bul týraly Májilistiń jalpy otyrysynda «Aýyl» partııasynyń tóraǵasy Serik Egizbaev aıtty.
«Negizgi basymdyqtyń biri — agroónerkásip kesheni men saýdany damytý dep atap ótken tapsyrmańyzǵa sáıkes Aýyl partııasy Úkimettiń aldyna birinshi kezekte aýyl turǵyndaryn, sonyń ishinde agroónerkásip keshenin tolǵandyratyn máselelerdi qoıǵan edi. Biz partııanyń ustanymy árqashan Prezıdent tapsyrmalarymen sáıkes keletinine rızamyz. Dıqandarymyz byltyr erekshe qıyn jaǵdaıǵa tap bolyp, kem degende 300 mlrd teńgege jýyq shyǵynǵa ushyrady. Sol kezde Aýyl partııasy Úkimetke saýal joldady. Ókinishke qaraı, qulaq aspady», — dedi «Aýyl» partııasynyń tóraǵasy Serik Egizbaev.
Onyń atap ótýinshe, ótken jyly sharýalarǵa kóp qıyndyq týǵyzǵan máseleler endi jańa Úkimetke ótedi.
«Jańa Úkimet agroónerkásip kesheniniń problemalyq máselelerin sheshedi dep úlken úmit artamyz. „Aýyl“ partııasy árqashan syndarly, konstrýktıvti pozıtsııa ustanǵan, sondyqtan da búgin Qasym-Jomart Kemeluly usynyp otyrǵan Premer-Mınıstr kandıdatýrasyn bizdiń partııa biraýyzdan úlken senimmen qoldaıdy. „Aýyl“ partııasy jańa Premer-Mınıstr men jańa Úkimet músheleri Prezıdentimizdiń tapsyrmalaryn dereý oryndaıtyn jáne Parlament depýtattarynyń, onyń ishinde 8 mıllıonǵa jýyq aýyl turǵyndarynyń múddesin qorǵaıtyn partııa depýtattarynyń usynystaryn eskeretin, qulaq asatyn, qajet sheshimderdi tez qabyldaıtyn, yqpaldy Parlamentke esep beretin myqty Úkimet bolady dep úmit artamyz», — dedi ol.
