Byltyr bankter «shybyq basyn syndyrmaı» 3 trıllıon teńgege jýyq tabys tapty — Prezıdent

ASTANA. KAZINFORM — Byltyr bankter «shybyq basyn syndyrmaı» 3 trıllıon teńgege jýyq tabys tapty. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev aıtty.

— Jańa ınvestıtsııalyq kezeńniń tıimdi júzege asýy kóbine qarjy sektorynyń belsendi atsalysýyna baılanysty. Búginde elimizdiń qarjy naryǵyndaǵy jıyntyq aktıvterdiń 84 paıyzy bank salasyna tıesili. Degenmen bızneske beriletin qaryz úlesi tómen deńgeıde qalyp otyr. Ne bary 38 paıyzdy quraıdy. Al ekinshi deńgeıli bankter byltyr «shybyq basyn syndyrmaı», esh qınalmaı 3 trıllıon teńgege jýyq tabys tapty, — dedi Memleket basshysy.

Prezıdent bankter ekonomıkanyń negizgi qarjylandyrý kózi retinde óziniń zańdy róline oralýy úshin jaǵdaı jasaý qajet degen talaı ret aıtylǵanyn eske saldy.

— Biraq syltaý taýsylmaıdy. Nátıjesinde bank júıesindegi alaıaqtyq áreketterge kýá boldyq. Іri, júıe quraýshy bankter memleket tarapynan orasan zor kómek berilgenine qaramastan, daǵdarysqa ushyrap, týra maǵynasynda 1 dollarǵa satyldy, — dedi Qasym-Jomart Toqaev.

Memleket basshysy qazir bankterdiń ózine tartatyn qarjy resýrstarynyń quny joǵary degen áńgime aıtyla bastaǵanyn atap ótti.

— Olardyń ekonomıkany qarjylandyrýyna osy kedergi keltirip otyr-mys. Demek, ekonomıkany qoljetimdi kredıtpen qamtamasyz etýdiń jalǵyz joly — ınflıatsııany turaqtandyryp, deńgeıin tómendetý, sodan keıin naryqtyq mólsherlemeni azaıtý. Taǵy da qaıtalap aıtamyn: bul rette Úkimet pen Ulttyq banktiń júıeli, úılesimdi ári kásibı turǵyda jumys istegeni mańyzdy. Halyqaralyq valıýta qorynyń keńesine qulaq asyp, túrli termınologııany ońdy-sońdy qoldanýǵa asa kóp aqyldyń qajeti joq. Azdap oılanyp, tym bolmasa kóptegen túıtkildi sheshýge talaptanyp kórý, bul — basqa másele, — dedi Prezıdent.

Buǵan deıin Prezıdent memleket jeke kapıtal rólin ózine alýdan bas tartýy qajettigin aıtqan edi.