Byltyr Ázerbaıjan arqyly qazaqstandyq munaıdy tasymaldaý 1,5 mln tonnaǵa jýyqtady

ASTANA. KAZINFORM — Memleket basshysy brıfıng barysynda Qazaqstan munaıyn Baký – Tbılısı – Jeıhan baǵdary boıynsha tasymaldaý jónindegi birlesken jumys týraly aıtty. Bul týraly Aqordanyń baspasóz qyzmeti habaralady. 

Kelissózderde energetıka salasyndaǵy yntymaqtastyqty nyǵaıtý mańyzdy taqyryptyń biri boldy. Bul baǵytta eki eldiń de áleýeti mol. 

– Qazaqstan munaıyn Baký – Tbılısı – Jeıhan baǵdary boıynsha tasymaldaý jónindegi birlesken jumysty erekshe atap ótkim keledi. Byltyr Ázerbaıjan arqyly bul strategııalyq shıkizat tranzıti bir jarym mıllıon tonnaǵa jýyqtady. Jaqyn arada muny aıtarlyqtaı ulǵaıtý qajet. Teńiz tabanyna tóseletin elektr kabelderi jobasy ulttyq energııa júıesin damytýǵa serpin beredi. Bul bizdiń «jasyl» energııa eksportyndaǵy pozıtsııamyzdy kúsheıte túsedi. Ázerbaıjan aýmaǵy arqyly qazaqstandyq ýran ónimderin shetel naryqtaryna jetkizý aıasynda aýqymdy jumys júrgizilip jatyr. Osy oraıda barlyq negizgi bastamalar men jobalarǵa qoldaý kórsetkeni úshin qurmetti Ázerbaıjan Prezıdentine rızashylyǵymdy bildiremin, - dedi Prezıdent. 

Memleketter basshylary jasandy ıntellektiniń qarqyndy damyp kele jatqanyn eskere otyryp, ІT sektor ekijaqty qatynastarǵa mol múmkindik ashatynyna toqtalǵan. 

– Qazaqstan memlekettik qyzmetti tsıfrlandyrýda, ІT tehnologııalardy damytýda tájirıbe jınaqtady. Biz osy salada birlesken jobalardy iske asyrýǵa daıynbyz. Kelissózder barysynda Kaspıı teńiziniń tabany arqyly talshyqty-optıkalyq baılanys jelisin tartý jobasyn jedeldetýdiń mańyzyn atap óttik. Úkimetterge ony qysqa merzim ishinde ázirleý jóninde tapsyrma berildi, – dedi Qasym-Jomart Toqaev.

Eske sala keteıik, buǵan deıin Qazaqstan men Ázerbaıjan prezıdentteri brıfıng ótkizgenin jazǵanbyz.