Byltyr aýdıtorlar 250 nysanǵa tekseris júrgizgen

ASTANA. KAZINFORM — 2025 jyly aýdıtorlar memlekettik saıasattyń, ekonomıkanyń jáne qoǵamdyq ómirdiń negizgi baǵyttaryn qamtıtyn ondaǵan keshendi jáne salalyq tekserý júrgizdi. Bul týraly Joǵary aýdıtorlyq palata málim etti.

Memleket basshysy Qasym-Jomart Toqaev bıýdjet qarajaty men memleket resýrstarynyń tıimdi paıdalanylýy máselesine erekshe nazar aýdarady. Elimizde osy maqsatta memlekettik aýdıt júıesinde dáıekti túrde reformalar iske asyrylyp, júıe kúsheıip keledi, tsıfrlyq monıtorıng tehnologııalary engizilýde, halyqaralyq tájirıbege taldaý júrgizilip, qoldanylyp otyr. 

— Aýdıtorlar 250 obektini ári 74 trln teńgeni qamtyǵan 32 iri tekserý júrgizildi. 2,9 trln teńgeden astam somaǵa túrli zań buzýshylyqtar anyqtaldy, — delingen habarlamada.

Qazirdiń ózinde memleket paıdasyna 365 mlrd teńge ótelip, qalpyna keltirildi. 293 jeke jáne zańdy tulǵa ákimshilik jaýaptylyqqa tartyldy. Aýdıt qorytyndylary boıynsha 44 materıaldy quqyq qorǵaý organdaryna berý týraly sheshim qabyldanǵan.

— QR Úkimeti men aýdıt obektilerine 132 usynym jáne oryndalýy mindetti 1,4 myń naqty tapsyrma jiberildi. 2025 jyly júrgizilgen Joǵary aýdıtorlyq palatanyń jumysy elimizde memlekettik basqarýdyń tıimdiligin arttyrýǵa jáne bıýdjet qarajatyn paıdalanýdy jaqsartýǵa eleýli úles qosty, — dep habarlady quzyrly organnan.

Aıta keteıik, Joǵary aýdıtorlyq palata eldegi eki iri qordy tekseredi.