Byltyr Atyraýda 7 640 ekologııalyq quqyq buzýshylyq anyqtaldy

ATYRAÝ.KAZINFORM – Atyraý oblysynda byltyr ruqsat etilmegen oryndarǵa qoqys tógý, sarqyndy sýdy zańsyz aǵyzý, polıgondardyń órtenýi, qaldyqtardy ýaqytyly jınamaý jáne sanıtarııalyq talaptardy saqtamaý syndy derekterge qatysty 7640 quqyq buzýshylyq anyqtalǵan. 

Nátıjesinde tártipke baǵynbaǵandar 132,7 mln teńge aıyppul arqalaǵan. Onyń 60,2 mln teńgesi óndirildi.

Atyraý oblystyq tabıǵı resýrstar jáne tabıǵat paıdalanýdy retteý basqarmasynyń resmı aqparatyna súıensek, memlekettik áleýmettik tapsyrys negizinde Atyraý qalasynda zańsyz karerler men kezdeısoq qoqys oryndaryn anyqta jobasy sheńberinde basqarma, ekologııa jáne polıtsııa departament ókilderiniń qatysýymen reıdter uıymdastyrylǵan. 

- Tekserý barysynda ruqsat qujattary joq júk kólikterimen qoqys pen sarqyndy sý tógý faktileri anyqtaldy. Nátıjesinde QR ÁQBtK-niń 505-baby boıynsha 471 360 teńge aıyppul salynyp, birqatar azamatqa eskertý jasaldy. Polıgondardyń órtenýi, qaldyqtardy ýaqytyly jınamaý, sanıtarııalyq talaptardyń saqtalmaýy, jabdyqtalmaǵan oryndarǵa qaldyq tógý jáne qaldyqtardy basqarý kezinde ekologııalyq talaptardyń buzylýyna qatysty bolyp barlyǵy 796 230 teńge aıyppul salyndy, - dep málimdedi basqarma.

Dronmen zerdeleý nátıjesinde oblys aýmaǵynda 40 zańsyz qoqys orny belgili bolǵan. Onyń 35-i tazartylǵan. 5 oryn jeke sektorǵa qatysty. Jalpy oryndaý kórsetkishi – 87%. Atyraý qalasynda 19 orynnyń 14-i, Jylyoı aýdanyndaǵy 13 jáne Mahambet aýdanyndaǵy 7 aýmaq tolyq tazalanǵan. Maqat aýdanynda anyqtalǵan 1 oryn qalpyna keltirilgen.

Osyǵan deıin bıyl Atyraýda ekologııanyń turǵyndarǵa áserin ǵylymı zertteý bastalaty jóninde jazǵan edik.