Byltyr Atyraýda 10 myńǵa jýyq buralqy ıt aýlanǵan
ATYRAÝ.KAZINFORM – Ótken jyly óńirde turǵyndardyń shaǵymdary, veterınarlar men kınologtardyń qorytyndysy negizinde adamǵa qaýip tóndiredi dep tanylǵan 9 109 ıt joıylǵan. Al 423 ıt bıozararsyzdandyrylyp, vaktsınatsııa jasalǵannan keıin qaýipsiz dep tanylyp, tabıǵı ortasyna qaıta jiberildi.
Buralqy ıtterdi aýlaý jumystaryn 3 merdiger mekeme júrgizdi. Atyraý oblystyq aýyl sharýashylyǵy jáne jer qatynastary basqarmasynyń resmı aqparatyna súıensek, bul jumysqa 80 mln teńge bólinip, 70 mln teńgege jýyǵy tolyqtaı ıgerilgen. Onyń 15 mıllıony ıtterdi ýaqytsha ustaýǵa, 11 mln birdeılendirýge, vaktsınalaýǵa 22 mln teńge jumsalǵan.
Basqarmanyń baspasóz qyzmeti 2026 jyldan bastap qańǵybas jáne qaraýsyz janýarlardy aýlaý jáne joıý jumystary qala men aýdan ákimdikterine júktelgenin málimdedi.
Osy salada jumys isteıtin erikti Mamýchar Jabasovtyń aıtýynsha, qańǵybas ıtterdiń kóbeıýine kóbine turǵyndardyń jaýapsyz áreketi sebep bolyp otyr. Keıbir azamattar ıt asyrap, keıin oǵan durys kútim jasamaı, kóshege tastap ketedi. Bul óz kezeginde buralqy janýarlar sanynyń artýyna ákeledi.
– Qaraýsyz ıtterdi atý máseleni túbegeıli sheshpeıdi. Olardy ustaý, tekserý, qaýipsiz bolǵan jaǵdaıda pishtirý jáne vaktsınatsııa jasap qaıta jiberý áldeqaıda tıimdi. Bul tásil ıtterdiń sanyn tabıǵı jolmen shekteýge múmkindik beredi. Sonymen qatar úı janýarlaryn mindetti túrde tirkeýden ótkizip, chıp salý qajet. Itter tek arnaıy tirkelgen mekemeler arqyly satylýy tıis. Bul baqylaýdy kúsheıtip, janýarlardan sebepsiz bas tartý jaǵdaılaryn azaıtady, – dedi M. Jabasov.
Mamandardyń aıtýynsha, qala aýmaǵyndaǵy buralqy ıtter keı jaǵdaıda jabaıy ańdardyń eldi mekenge kirýine tosqaýyl bolady. Al turǵyndardy alańdatatyn qutyrma aýrýy óńirde sırek tirkeledi.
Aıta keteıik, Qazaqstan Respýblıkasynda «Janýarlarǵa jaýapkershilikpen qaraý týraly» zań 2021 jylǵy 30 jeltoqsanda qabyldanyp, 2022 jylǵy 2 naýryzdan bastap kúshine endi. Atalǵan zańǵa sáıkes qańǵybas ıtterdi atýǵa resmı túrde tyıym salynǵan.
Osyǵan deıin Almatyda buralqy janýarlardy ustaýǵa 830 mln teńge bólingenin jazǵan edik.