Byltyr Astana halyqaralyq qarjy ortalyǵy 2,5 trln teńge kapıtal tartqan

ASTANA. KAZINFORM — Úkimettiń keńeıtilgen otyrysynda Ulttyq bank tóraǵasy Tımýr Súleımenov bıyl Qazaqstannyń memlekettik baǵaly qaǵazdary JPMorgan Frontier Markets halyqaralyq ındeksine kiretinin aıtty.

— Qor naryǵynyń róli de artyp keledi. Aktsııalar naryǵy 19%, oblıgatsııalar naryǵy 8% ósti. Jańa oblıgatsııalar shyǵarylymy 4,7 trln teńge boldy. KASE ındeksi 26% ósti. Astana halyqaralyq qarjy ortalyǵynyń ındeksi 26,8% ósti. Astana halyqaralyq qarjy ortalyǵynyń alańynda tartylǵan kapıtal 2,5 trln teńge boldy. Beırezıdentterdiń memlekettik baǵaly qaǵazdarǵa ınvestıtsııalaý kólemi eki ese artyp, 3,9 mlrd dollarǵa jetti, — dedi ol. 

Ulttyq bank basshysy memlekettiń qaryz alý quny 1,5-2% tómendegenin aıtady.

— Bul memleket júrgizip otyrǵan makroekonomıkalyq saıasatqa degen senimdi kórsetedi. Boryshtyq saıasattyń tıimdiligin arttyrý úshin ótken jyly Úkimet pen Ulttyq Bank Memlekettik boryshty basqarý keńesin qurdy. Euroclear jáne Clearstream júıesine qosylý arqyly esep aıyrysý ınfraqurylymy jetildirildi. Bıyl memlekettik baǵaly qaǵazdarymyzdyń JPMorgan Frontier Markets halyqaralyq ındeksine kirýin kútip otyrmyz. Bul sheteldik ınvestıtsııalardyń odan ári ósýine jáne syrtqy qaryz alý qunyn tómendetýge septigin tıgizedi, — dedi Tımýr Súleımenov.

Aıta keteıik, búgin Memleket basshysy Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr. Jıynda eldiń 2025 jylǵy áleýmettik-ekonomıkalyq damýy qorytyndylanyp, Úkimettiń aldaǵy kezeńge arnalǵan negizgi mindetteri aıqyndalady.