Byltyr ardagerlerge arnaýly memlekettik járdemaqy túrinde 16 mlrd-tan astam teńge tólendi
ASTANA. KAZINFORM — 2025 jylǵy 1 qańtardaǵy jaǵdaı boıynsha Qazaqstanda 85 203 ardager turady. Bul týraly QR Eńbek jáne halyqty áleýmettik qorǵaý mınıstrligi málim etti.

Onyń ishinde Uly Otan soǵysynyń 120 ardageri, jeńildikter boıynsha UOS ardagerlerine teńestirilgen 16 983 ardager, 26 506 basqa memleketterdiń aýmaǵyndaǵy urys qımyldarynyń ardageri, 41 594 UOS jyldaryndaǵy tyl eńbekkeri bar. 2024 jyly ardagerlerdiń atalǵan sanattaryna 16,7 mlrd teńge somasynda arnaýly memlekettik járdemaqy tólendi.
2025 jyly osy maqsattarǵa 17 mlrd teńge qarastyrylǵan.
- Respýblıkalyq bıýdjetten beriletin aı saıynǵy arnaýly memlekettik járdemaqy ardagerlerdiń barlyq sanattaryna, ózge de áleýmettik tólemderdi alýyna qaramastan, mynadaı mólsherde tólenedi:
- UOS ardagerleri — 16 AEK (2025 jyly — 62 912 teńge);
- jeńildikteri boıynsha UOS ardagerlerine teńestirilgen ardagerler, olardyń ishinde:
— UOS kezeńinde jaraqat alýy, kontýzııa alýy, mertigýi nemese aýrý saldarynan múgedektigi bar adamdarǵa jeńildikter boıynsha teńestirilgen adamdar — 7,55 AEK (2025 jyly — 27 875 teńge);
— jeńildikter boıynsha UOS qatysýshylaryna teńestirilgen tulǵalar — 6,19 AEK (2025 jyly — 24 339 teńge);
- basqa memleketterdiń aýmaǵyndaǵy urys qımyldarynyń ardagerleri, onyń ishinde:
— Aýǵanstandaǵy urys qımyldaryna qatysýshylar — 6,19 AEK (2025 jyly — 24 339 teńge);
— Tájik-Aýǵan ýchaskesinde TMD shekarasyn qorǵaýdy kúsheıtý jónindegi mindetterdi oryndaǵan, Iraktaǵy halyqaralyq bitimgershilik operatsııaǵa, Taýly Qarabaqtaǵy etnosaralyq qaqtyǵysty retteýge qatysqan áskerı qyzmetshiler — 4,8 AEK (2025 jyly — 18 874 teńge);
- UOS jyldaryndaǵy tyl eńbekkerleri — 2,13 AEK (2025 jyly — 8 376 teńge).
Uly Otan soǵysyndaǵy Jeńistiń 80 jyldyǵyn merekeleý aıasynda UOS ardagerlerine 5 mln teńge kóleminde birjolǵy materıaldyq kómek tóleý josparlanyp otyr.
Eske sala keteıik, buǵan deıin bıyl Uly Jeńiske 80 jyl tolatynyn jazǵan bolatynbyz.