Byltyr aqyly joldardan 90 mlrd teńgege tarta qarajat jınaldy
ASTANA. KAZINFORM — 2025 jyly aqyly joldardan 87 mlrd teńge tústi. Bul týraly Kólik mınıstrligi málim etti.
— Byltyr aqyly joldardan 87 mlrd teńge jınaldy. Aqyly joldardan túsetin barlyq kiris avtomobıl joldaryn kútip-ustaý men damytýǵa tolyqtaı baǵyttalady. Bul qarajat jol jabynyn júıeli túrde jóndeýge jáne qalpyna keltirýge, jol ınfraqurylymyn tazalaý men kútip-ustaýǵa, jol qozǵalysy qaýipsizdigin qamtamasyz etýge, jol belgileri, jaryqtandyrý júıeleri men ınjenerlik qurylystardy ornatýǵa jáne olardyń úzdiksiz jumysyn qamtamasyz etýge jumsalady, — delingen vedomstvonyń Kazinform agenttigine bergen jaýabynda.
Sonymen qatar, atalǵan qarajat esebinen avtomobıl joldaryn qysqy jáne jazǵy kezeńderde kútip-ustaý jumystary júrgiziledi, onyń ishinde qar tazalaý, kóktaıǵaqqa qarsy óńdeý men jol jıegin abattandyrý sharalary qamtylady.
— Osylaısha, aqyly júıe joldardyń sapaly kúıin saqtaýǵa jáne barlyq jol paıdalanýshylary úshin qaýipsiz ári qolaıly qozǵalys jaǵdaılaryn jasaýǵa múmkindik beredi, — dep naqtylady mınıstrlik.
Aıta keteıi, buǵan deıin kólik júrgizýshileri qaı aqyly jolmen kóp sapar shegetini belgili boldy.
Sonymen qatar, aqyly joldardaǵy tólem jasaý erejeleri jeńildeıtini málim boldy.
Jańartylǵan tásilder júrgizýshilerge tólemdi ýaqytyly júzege asyrý úshin qosymsha ýaqyt pen múmkindikter usynyp, tólem jasaý úderisin barynsha yńǵaıly ári túsinikti etýdi kózdeıdi.