Byltyr 92 mlrd teńge nege ıgerilmedi – Úkimet esebi

ASTANA. KAZINFORM — Búgin Parlament Májilisinde 2024 jylǵy bıýdjettiń atqarylýy týraly Úkimet esebin tanystyrý kezinde Qarjy vıtse-mınıstri Dáýren Temirbekov bıýjet shyǵystaryna túsinik berdi.

— Bıýdjet shyǵystary 97,8 paıyzǵa atqaryldy jáne 23,6 trln teńgeni qurady. 526 mlrd teńge atqarylmady. Onyń ishinde 12 mlrd teńge — bul Úkimet rezervi qarajatynyń bólinbegen qaldyǵy jáne ózge de únemdeý. 422 mlrd teńge somasyndaǵy atqarylmaý bıýdjettik kredıtter men Áleýmettik medıtsınalyq saqtandyrý qoryna transfertter boıynsha shyǵystarǵa bólinbeý sebebinen qalyptasty. Alaıda, atalǵan jaǵdaıdyń halyqqa tikeleı áser etpegenin atap ótkim keledi, qajet medıtsınalyq qyzmetter Áleýmettik medıtsınalyq saqtandyrý qorynyń esebinen kórsetilgen. 92 mlrd. teńge — ıgerilmegen, — dedi D. Temirbekov.

Igerilmeýdiń negizgi sebepteri: sharttardy jasamaý, ónim berýshilerdiń taýarlardy ýaqtyly jetkizbeýi, josparlanǵan is-sharalardy ýaqtyly ótkizbeý, konkýrstyq rásimderdi uzaqqa sozyp ótkizý jáne ónim berýshilerdiń shart talaptaryn buzýy.

Budan buryn habarlanǵandaı, Májilis tóraǵasynyń orynbasary Danııa Espaeva 2024 jyly tıimsiz paıdalanylǵan bıýdjet qarajaty men aktıvter kólemi 2 esege jýyq óskenin aıtty.