Byltyr 9 aıda 373 mln dollarǵa IT qyzmet eksporttaldy – mınıstrlik

ASTANA. KAZINFORM – Ótken jyly qańtar-qyrkúıek aılary aralyǵynda elimiz 373 mln dollarǵa IT qyzmetter eksporttaǵan.

Bıyl naýryzda kórsetkish 500 mln dollarǵa jetpek. Bul týraly Tsıfrlyq damý, ınnovatsııalar jáne aeroǵarysh ónerkásibi mınıstrliginiń Aqparattyq tehnologııalar salasyn damytý departamentiniń dırektory Ersultan Ermanov málim etti.

«Ótken jyldyń 9 aıynyń qorytyndysy boıynsha jaqynda Ulttyq bank resmı derekterin jarııalady. Atalǵan ýaqyt ishinde IT qyzmetterdiń eksporty 373 mln dollardy qurady. Bıyl Ulttyq banktiń resmı esebi naýryz aıynda jarııalanady, eksport kóleminiń 500 mln dollarǵa jetetinine senimdimiz», - dedi mınıstrliktiń aqparattyq tehnologııalar salasyn damytý departamentiniń dırektory Ersultan Erjanov Ortalyq kommýnıkatsııalar qyzmeti alańynda ótken baspasóz máslıhatynda.

Mınıstrlik ókiliniń málimdeýinshe, IT qyzmetterdi eksporttaý jyl saıyn artyp keledi. Máselen, 2020 jyly 30 mln dollardy qurasa, 2022 jyldyń qorytyndysy boıynsha 343 mln dollar.

Sondaı-aq, spıker eksporttyń ósýine 2018 jyly Astana Hub halyqaralyq tehnoparkiniń ashylýy áser etti. Atap aıtqanda, akseleratsııalyq bilim berý baǵdarlamalary iske qosyldy, sondaı-aq IT-kompanııalar salyqtan bosatyldy.