Byltyr 62,7 myń gektardy sharpyǵan 609 orman órti tirkeldi

ASTANA. KAZINFORM — 2025 jyly órt qaýpi joǵary maýsymda memlekettik orman qory jerlerinde jalpy aýdany 62,7 myń gektar bolatyn 609 orman órti tirkeldi. Bul týraly Ormandy memlekettik baqylaý, qorǵaý jáne kúzetý basqarmasynyń basshysy Jolbarys Nııaz málim etti.

Ormandardy órtten qorǵaý sharalaryn kúsheıtý maqsatynda 2023 jyldan bastap memlekettik orman ıelenýshilerdiń materıaldyq-tehnıkalyq bazasyn júıeli túrde jańǵyrtý bastaldy — bul sońǵy kóptegen jyldar ishindegi alǵashqy aýqymdy jańartý bolyp otyr.

Sala mamanynyń aıtýynsha, 2023–2024 jyldary jalpy 1078 birlik tehnıka jáne 1787 birlik qosymsha órtke qarsy jabdyq satyp alyndy, onyń ishinde:

• 118 órt sóndirý avtotsısternasy,

• 242 mobıldi orman órtke qarsy kesheni (MLPK),

• 516 traktor men júk kóligi,

• 202 patrýldik avtokólik,

• jáne 1787 túrli ózge de jabdyqtar.

Bıyl lızıngtik qarjylandyrý esebinen otandyq óndiristegi órt sóndirý tehnıkasyn jetkizý kózdelip otyr.

Jospar boıynsha 333 órt sóndirý kóligi, 370 mobıldi keshen jáne 339 traktor alynady.

2025 jyldyń basynan beri 352 birlik tehnıka jetkizildi.

Qalǵan memlekettik orman ıelenýshiler 2026 jylǵy órt qaýpi joǵary maýsym bastalǵanǵa deıin órtke qarsy tehnıkamen tolyq qamtamasyz etiledi.

Qabyldanyp jatqan sharalar eldiń eń órt qaýpi joǵary óńirlerindegi orman jáne tabıǵatty qorǵaý mekemelerin órtke qarsy tehnıkamen tolyq qamtamasyz etýge múmkindik beredi.

— Órt sóndirý mashınalary orman sharýashylyǵy mamandarynyń qatysýymen jáne orman órtterin sóndirý tájirıbesin taldaý negizinde ázirlendi. Tehnıkanyń konstrýktsııasy orman jaǵdaıynyń kúrdeli erekshelikterine beıimdelip, qazirgi zamanǵy qaýipsizdik pen tıimdilik talaptaryna saı keledi, — dedi Jolbarys Nııaz. 

Órt sóndirý kezinde mashınalardyń uzaq ýaqyt boıy órt oshaǵynda bolýy saldarynan dóńgelekterdiń qyzyp ketý jaǵdaılary tirkelgen, bul olardyń órt ornynan shyǵa almaı qalý qaýpin týdyrǵan.

Osyny eskere otyryp, jańa modelde kabına men dóńgelek doǵalarynyń ózdiginen sýytý júıesi engizildi — bul tótenshe jaǵdaıda asa mańyzdy element.

Órt sóndirý tehnıkasynyń negizgi fýnktsıonaldyq artyqshylyǵy — júris kezinde órt sóndirý múmkindigi, bul órt oshaqtaryn oqshaýlaý protsesin edáýir jyldamdatady.

Qurylymda joǵary ónimdi sorǵy ornatylǵan, ol turaqty sý berýdi qamtamasyz etedi.

Sý rezervýarynyń kólemi 3 tonna, bul orman ishindegi joldar men qıyn qoljetimdi aýmaqtarda júrip ótý men manevr jasaý múmkindigi arasyndaǵy ońtaıly teńgerimdi qamtamasyz etedi.

Memlekettik orman qory aýmaǵyndaǵy órt qaýpi joǵary jaǵdaı turaqty baqylaýda. 

Al, bıyl elimizde 320 orman órti tirkeldi.