Byltyr 6 myńnan astam ınternet-alaıaqtyq qylmysy áshkerelendi
ASTANA. KAZINFORM – 2025 jyly elimizde 28 myńǵa jýyq ınternet-alaıaqtyq qylmysy tirkeldi. Bul týraly Májilis depýtattarynyń saýalyna Іshki ister mınıstriniń birinshi Baýyrjan Álenovtiń jaýabynda aıtylǵan.
– 2025 jyly 27 892 ınternet-alaıaqtyq qylmysy tirkeldi. Olardyń jalpy qylmystar sanyndaǵy úlesi 29%-dy (96 354-ten), al barlyq alaıaqtyqtardyń ishindegi úlesi 61%-dy (45 806-dan) quraıdy. Atalǵan qylmys túrine qarsy is-qımyl jasaý maqsatynda birqatar uıymdastyrýshylyq-praktıkalyq shara qabyldanyp, tıisti vedomstvolyq jáne vedomstvoaralyq normatıvtik quqyqtyq aktiler iske asyrylyp jatyr. Qabyldanǵan sharalardyń nátıjesinde 2025 jyly osyndaı 6 016 qylmys ashyldy (aıaqtaldy), onyń ishinde 4 357-i – aýyr sanattaǵy qylmystar. Ashylý deńgeıi 21%-dy qurap, ashylǵan qylmystyq ister sany 36%-ǵa artty. Qylmystyq jaýapkershilikke 1 750 adam tartyldy, - dedi mınıstrdiń birinshi orynbasary.
Onyń atap ótýinshe, júrgizilgen taldaý ınternet-alaıaqtyqtardyń negizinen mynadaı tásildermen jasalatynyn kórsetken:
– bank, polıtsııa, memlekettik organdar qyzmetkerleriniń atynan – 8 554;
– habarlandyrýlar arqyly taýarlar men qyzmetter úshin aldyn ala tólem alý – 8 357;
– ınvestıtsııalaý syltaýymen – 3 110.
– 27 892 ınternet-alaıaqtyqtyń 49 faktisi boıynsha (0,175%) jábirlenýshiler ózderiniń turǵyn úı-jaılaryn úshinshi tulǵalarǵa zańdy túrde satqannan keıin alaıaqtarǵa aqsha qarajatyn bergen. Bul rette múlikti ıelikten aıyrýǵa qatysty olardyń quqyqtary buzylmaǵan. Atalǵan faktiler boıynsha 2 is sotqa joldandy, qalǵan ister boıynsha tergeý jalǵasýda. 60 jastan asqan jábirlenýshilerdiń úlesi 87%-dy quraıdy. Al jekelegen qylmystyq ister boıynsha keltirilgen zalal mólsheri 60 mln teńgege deıin jetedi. Bul sanattaǵy ister boıynsha negizgi problema – azamattardyń quqyq qorǵaý organdaryna kesh júginýi (5 kúnnen 30 kúnge deıin), sonyń saldarynan qylmystyń izderi joıylyp, urlanǵan aqsha qarajaty shetelge shyǵarylady, - dedi Baýyrjan Álenov.
Taıaýda Qazaqstan Bas prokýratýrasy Quqyqtyq statıstıka jáne arnaıy esepke alý jónindegi komıtetiniń Qylmystyq qaýip-qaterlerdiń jáne qoǵamdyq qaýipsizdiktiń táýekelderin boljaý ortalyǵy WhatsApp messendjerine qatysty jańa kıberqater týraly eskertken edi.