Byltyr 4100 sýyq qarýǵa uqsas zat tárkilendi — ІІM
ASTANA. KAZINFORM — Byltyr el aýmaǵynda zańmen tyıym salynǵan qarý-jaraq aınalymyn anyqtaý maqsatynda 400-den astam reıdtik is-shara ótkizildi. Onyń ishinde onlaın-platformalarǵa júrgizilgen monıtorıng te bar.
— Reıdtik is-sharalar barysynda sýyq qarýǵa uqsas 4 100 zat tárkilenip, olardyń 240-y sýyq qarý dep tanyldy, — dedi Іshki ister mınıstrligi Kazinform agenttiginiń resmı saýalyna berilgen jaýapta.
ІІM málimetinshe, anyqtalǵan faktiler boıynsha Qylmystyq kodeksiniń 287-baby (qarýdy, oq-dárilerdi, jarylǵysh zattardy jáne jarylys qurylǵylaryn zańsyz ıemdený, berý, ótkizý, saqtaý, tasymaldaý nemese alyp júrý), 288-baby (qarýdy zańsyz jasaý), sondaı-aq Ákimshilik quqyq buzýshylyqtar týraly kodekstiń 482-baby boıynsha qylmystyq jáne ákimshilik ister qozǵalǵan.
Aıta keteıik «Jekelegen qarý túrleriniń aınalymyna memlekettik baqylaý jasaý týraly» zańǵa sáıkes ushy 90 mıllımetrden asatyn, batyrmany nemese tutqany basý arqyly avtomatty túrde sabynan shyǵatyn jáne bekitiletin, sondaı-aq aýyrlyq kúshi nemese shapshań qozǵalys esebinen jyljıtyn pyshaqtardyń aınalymyna tyıym salynǵan.
Sonymen qatar sýyq qarýdy zańsyz alyp júrý nemese ótkizý qylmystyq jaýapkershilikke ákep soǵady. Mundaı quqyq buzýshylyqtar úshin aıyppul salý nemese qamaýǵa alý túrindegi jaza kózdelgen.
— Al qoldanystaǵy zańnamaǵa sáıkes qoǵamdyq oryndarda turmystyq maqsattaǵy zattardy — as úı pyshaqtaryn, baltalardy jáne ózge de suqpaly-kesetin quraldardy saqtaý men alyp júrgeni úshin jaýapkershilik belgilenbegen, — delingen habarlamada.
Aıta keteıik, Mańǵystaý oblysy Jańaózen qalasynda medıtsınalyq mekemede pyshaq jaraqatynan 44 jastaǵy er adam kóz jumdy. Oblystyq polıtsııa departamenti baspasóz qyzmetiniń habarlaýynsha, qaıǵyly jaǵdaı turmystyq janjal saldarynan bolǵan.
Eske salsaq, Shymkentte kólik júrgizýshiler men jolaýshylar arasynda janjal shyǵyp, sońy jappaı tóbeleske ulasqan. Oqıǵa saldarynan 40 jastaǵy er adam pyshaq jaraqatynan kóz jumdy, taǵy bir azamat aýrýhanaǵa jetkizildi. Atalǵan qylmysqa qatysy bar tórt kúdikti er adam anyqtalyp, ustaldy. Oqıǵa boıynsha «adam óltirý», «buzaqylyq» jáne «adamdy urlaý» baptarymen qylmystyq is qozǵaldy.
Sonymen qatar Shymkentte 21 jastaǵy qyzdy pyshaqtap óltirdi degen kúdikti ustalǵan edi.