Byltyr 40-tan astam qazaqstandyq shet elderde quldyqqa jegilgen – SІM
ASTANA. KAZINFORM — Syrtqy ister mınıstrligi shetelde adam saýdasynyń qurbany bolǵan qazaqstandyqtardyń sany resmı derekterden áldeqaıda kóp bolýy múmkin ekenin málimdedi.
– Buryn esirtki men qarý-jaraq saýdasy týraly jıi aıtatynbyz. Qazir adam saýdasy aldyńǵy qatarǵa shyqty. Qazaqstan azamattarynyń shetelde quldyqqa túsý faktileri bar. Kóbine bul Taıaý Shyǵys elderi men «altyn úshburysh» aımaǵynda kezdesedi. Atap aıtqanda, Bırma men Vetnamda osyndaı jaǵdaılar tirkeldi. Ótken jyly Qazaqstannyń konsýldyq qyzmetkerleriniń kómegimen 40-tan astam el azamaty qaıtaryldy, – dedi QR SІM-niń erekshe tapsyrmalar jónindegi elshisi Stanıslav Vasılenko.
Onyń sózinshe, qazirgi tańda adam saýdasy men zańsyz organ saýdasy – álemdegi eń tabysty qylmystyq bıznestiń biri. Al quldyqqa túsken jandar keı jaǵdaıda jumysqa jegiledi.
– Olardyń arasynda skam-ortalyqtarda jumys isteýge májbúr bolǵan azamattar men seksýaldyq quldyqqa jegilgen qyz-kelinshekter de bolǵan. Keıbir azamattar ózderi habarlasyp, kómek surady. Sonymen qatar elshilikter men konsýldyqtar da olardyń elge oralýyna kómektesti, – dedi ol elordada «Adam saýdasyna qarsy is-qımyl týraly zań jáne ony quqyqtyq qoldaný tájirıbesi» taqyrybynda ótken dóńgelek ústelde.
Stanıslav Vasılenko qazaqstandyqtardy shetelge shyǵar aldynda barynsha saq bolýǵa shaqyrdy.
– Joǵary jalaqy ýáde etken kúmándi habarlandyrýlarǵa sene bermeý kerek. Shetelge shyqqanda mindetti túrde Qazaqstan elshilikteri men konsýldyqtarynyń baılanys nómirlerin ózińizben birge alyp júrińizder. Eger qandaı da bir alaıaqtyq shema baryn sezseńizder, Syrtqy ister mınıstrligine júginińizder, – dep eskertti ol.
Aıta keteıik, buǵan deıin portalymyzda sábı saýdasy, vebkam jáne qanaý sekildi máselelerdi ІІM-niń áshkerelegeni jaıly materıal jarııalandy.
