Byltyr 366 pedıatrııalyq bólimshe ashyldy - mınıstrlik
ASTANA. KAZINFORM – QR Densaýlyq saqtaý mınıstrligi balalar medıtsınasy salasyn kúsheıtý baǵytyndaǵy jumystyń nátıjesinde ótken jyly 366 pedıatrııalyq bólimshe ashylǵanyn habarlady.
Vedomstvo málimetinshe, pedıatrııalyq kómekti uıymdastyrýdaǵy ózgerister ýchaskelerdi qysqartý nemese júıeni álsiretýge emes, balalardy medıtsınalyq qoldaýdyń keńeıtilgen keshendi modelin engizýge baǵyttalǵan.
Balany keshendi medıtsınalyq súıemeldeýdi qamtamasyz etý jáne mamandandyrylǵan kómekti kúsheıtý maqsatynda 2025 jyldyń maýsym aıynan bastap turǵylyqty jeri boıynsha emhanalarda 366 pedıatrııalyq bólimshe jumys isteı bastady.
Pedıatrııalyq bólimshelerdi qurýdyń negizgi mindetteri – týǵannan bastap balalardyń densaýlyǵyn júıeli baqylaý, damý buzylystaryn erte anyqtaýdy kúsheıtý, kópbeıindi tásildi engizý, jalpy praktıka dárigerleri men pedıatrlar arasyndaǵy úılestirýdi arttyrý jáne mamandandyrylǵan kómekti otbasynyń turǵylyqty jerine jaqyndatý.
Bólimsheler quramyna:
- pedıatr kabınetteri,
- Damý jáne erte aralasý ortalyqtary,
- patronaj qyzmetiniń dáriger-sýpervaızer kabıneti,
- meıirger kabınetteri,
- balany damytý jónindegi mamandar,
- tamaqtaný jónindegi resýrstyq ortalyq,
- shý oqshaýlaǵyshy bar aýdıologııalyq skrınıng kabıneti,
- egý kabıneti jáne mektep medıtsınasy kabıneti kiredi.
Jańa týǵan nárestelerge, 3 jasqa deıingi balalarǵa jáne erekshe qajettilikteri bar balalarǵa erekshe nazar aýdarylady. Damý erekshelikteri anyqtalǵan jaǵdaıda bala damý jáne erte aralasý ortalyǵyna jiberilip, ony pedıatr, patronajdyq meıirger, reabılıtolog, logoped, psıholog jáne basqa da mamandardan quralǵan kópbeıindi top súıemeldeıdi.
2025 jyldan bastap medıtsınalyq-sanıtarlyq alǵashqy kómek uıymdarynyń bazasynda 336 damý jáne erte aralasý ortalyǵy jumys isteıdi. Bir jyl ishinde bul ortalyqtarda 72 myńnan astam balaǵa konsýltatsııa berilip, damý buzylystaryn anyqtaý kórsetkishi 21,5%-ǵa artqan.
Ata-analarǵa medıtsınalyq kómekpen qatar, bala kútimi, tamaqtandyrý, damytý jáne tárbıeleý máseleleri boıynsha da túsindirý jumystary júrgiziledi.
Mınıstrlik málimetinshe, qoldanystaǵy medıtsınalyq-sanıtarlyq alǵashqy kómek modeliniń negizinde otbasylyq-baǵdarlanǵan tásil jatyr. Otbasy birtutas júıe retinde qarastyrylyp, medıtsınalyq qoldaý jan-jaqty ári úzdiksiz júzege asyrylady. Bul modelde barlyq otbasy músheleriniń, sonyń ishinde balalardyń densaýlyǵyn baqylaýdy qamtamasyz etetin jalpy praktıka dárigerleri sheshýshi ról atqarady.
Densaýlyq saqtaý mınıstrligi pedıatrııalyq qyzmetti nyǵaıtý boıynsha jumysty jalǵastyryp, árbir balaǵa bilikti medıtsınalyq kómektiń qoljetimdiligin qamtamasyz etetinin málimdedi.
Aıta keteıik, Qazaqstanda pedıatr qabyldaýy qyzmetiniń quny qansha teńge bolatynyn mynaý silteme arqyly bile alasyz.