Byltyr 276 myńnan astam adam ótinish berýsiz járdemaqy alý múmkindigin paıdalandy
ASTANA. KAZINFORM – Otbasynyń tsıfrlyq kartasyn (budan ári – OTsK) engizýdiń nátıjesinde 2025 jyly áleýmettik-eńbek salasyndaǵy memlekettik qyzmetterdi proaktıvti kórsetý úshin 529,6 myń adamǵa SMS-habarlama joldandy. Bul rette 276,2 myńnan astam adam ótinish berýsiz járdemaqy nemese tólem alý múmkindigin paıdalandy.
Otbasynyń tsıfrlyq kartasy memlekettik organdardyń qoldanystaǵy barlyq aqparattyq júıeleriniń derekteri negizinde qalyptastyrylady. Búginde onda Qazaqstannyń 20 mln azamaty nemese 6,2 mln-nan astam otbasy týraly aqparat jınaqtalǵan.
OTsK engizýdiń basty maqsaty – qazaqstandyqtardyń memlekettik qoldaý júıesine teń qoljetimdiligin qamtamasyz etý. Osyǵan baılanysty QR Áleýmettik kodeksinde Otbasynyń tsıfrlyq kartasy áleýmettik saıasattyń orta jáne uzaq merzimdi mindetteri men baǵyttaryn aıqyndaý quraly retinde belgilengen. Sondaı-aq, OTsK azamattardyń áleýmettik mártebesine baılanysty kepildendirilgen memlekettik qoldaýdyń qandaı da bir túrin alýǵa quqyly ekendigi týraly kúndelikti «elektrondyq habarlama» bolyp tabylady.
Qazirgi ýaqytta OTsK memlekettik qoldaý sharalaryn alýǵa quqyǵy bar qazaqstandyqtarǵa qandaı da bir ótinishtersiz járdemaqylar men áleýmettik tólemderdiń 11 túrin resimdeýge múmkindik beredi. Olar eńbek etý qabiletinen aıyrylǵan jaǵdaıda áleýmettik tólem; jumysynan aıyrylǵan jaǵdaıda áleýmettik tólem, asyraýshysynan aıyrylý boıynsha áleýmettik tólem; Bala týý men kútimine járdemaqy, múgedektigi bar balany tárbıelep otyrǵan ata-anasyna (qamqorshysyna) járdemaqy, múgedektigi boıynsha járdemaqy, kópbalaly otbasylarǵa beriletin járdemaqy, «Altyn alqa» jáne «Kúmis alqamen» marapattalǵan kópbalaly analarǵa beriletin járdemaqy, ataýly áleýmettik kómek, sondaı-aq jerleýge arnalǵan birjolǵy tólem.
Sondaı-aq, OTsK arqyly zeınetaqy tólemderin alý múmkindigi, «qandas» mártebesi berilgende nemese uzartylǵanda mártebeniń aıaqtalý merzimi jáne jumyssyz adamdar úshin jumyspen qamtý sharalary týraly avtomatty habarlamalar iske asyryldy.
Memlekettik qoldaý sharalaryn alýǵa quqyq belgilengen kezde áleýetti alýshyǵa 1414 biryńǵaı baılanys ortalyǵynan SMS-habarlama jiberiledi. Habarlama alǵan azamat oǵan kelisimi týraly jaýap berýi kerek. Ótinishti resimdeý jáne áleýmettik járdemaqy nemese tólem taǵaıyndaý avtomatty rejımde júrgiziledi, sodan keıin aqsha qarajaty alýshynyń bank shotyna aýdarylady.
Budan buryn Qazaqstanda zeınetaqy men járdemaqy kóbeıgenin habarlaǵanbyz.
