Byltyr 2,5 myń otbasy ataýly áleýmettik kómek alý úshin jalǵan qujat ótkizgen
ASTANA. KAZINFORM — Eńbek jáne halyqty áleýmettik qorǵaý mınıstrligi Kazinform saýalyna joldaǵan jaýabynda byltyr 453 myń adamnyń ataýly áleýmettik kómekten ajyratylǵanyn málim etti.
«2023 jyldyń qorytyndysy boıynsha 84,6 myń otbasyna, onyń ishinde 453 myń adamǵa AÁK taǵaıyndaýdan bas tartyldy. Onyń ishinde jalǵan qujattar nemese jalǵan aqparat berý faktisin anyqtaý sebebinen — 2,5 myń otbasy, onyń ishinde 13,9 myń adam, kiristi jasyrý faktisin anyqtaý boıynsha — 370 otbasy, onyń ishinde 2,1 myń adam memlekettik qoldaýdan ajyratyldy» dep jazylǵan mınıstrlik málimetinde.
Vedomstvo usynǵan jaýapta AÁK taǵaıyndaý tártibi áli de jetildiriletini aıtylǵan.
«Azamattardyń shyǵystaryn eskere otyryp, AÁK kórsetý júıesin qaıta qurý josparlanýda. Máselen, múddeli memlekettik organdarmen birlesip negizgi shyǵystardy esepke alý jáne verıfıkatsııalaý tetigi pysyqtalýda. Bul bir jaǵynan bıýdjettiń shyǵys bóligin de aıqyndaýǵa múmkindik beredi. AÁK transformatsııasynyń barlyq protsesterinde adam faktoryn alyp tastaý kózdelgen, tsıfrlandyrý bolady» delingen jaýapta.
