Byltyr 207 myńnan astam qazaqstandyq arnaıy memlekettik járdemaqy aldy
ASTANA.KAZINFORM - Qazaqstanda el aldyndaǵy aıryqsha eńbegi úshin nemese tótenshe jaǵdaılar saldarynan zardap shekken azamattarǵa qosymsha áleýmettik kómek retinde respýblıkalyq bıýdjetten aı saıyn arnaıy memlekettik járdemaqy tólenedi.
Eńbek jáne halyqty áleýmettik qorǵaý mınıstrligi málimetinshe, 2025 jylǵy 31 jeltoqsandaǵy jaǵdaı boıynsha, atalǵan járdemaqyny alýshylardyń sany 207,2 adamǵa jetti, olarǵa 26,7 mlrd teńge tólendi.
Bul memlekettik qoldaý túri Qazaqstanda 1999 jyly engizildi jáne halyqty áleýmettik qorǵaý júıesiniń mańyzdy elementi bolyp sanalady.
AMJ alýǵa quqyly azamattardyń 17 sanaty Qazaqstan Respýblıkasy zańnamasymen belgilengen. Olardyń qatarynda Uly Otan soǵysynyń ardagerleri men basqa memleketterdiń aýmaǵynda ótken áskerı is-qımyldarǵa qatysqan ardagerler, Uly Otan soǵysynyń ardagerlerine teńestirilgen azamattar, Uly Otan soǵysy kezinde qaza tapqan jaýyngerlerdiń áıelderi men qaza tapqan áskerı qyzmetkerlerdiń otbasy músheleri, «Halyq qaharmany», «Qazaqstannyń Eńbek Eri» ataqtaryna ıe bolǵandar, tyl eńbekkerleri, Chernobyl atom elektr stantsııasyndaǵy apattyń saldaryn joıýǵa qatysqandar, saıası repressııalardyń qurbandary, múgedektigi bar adamdar nemese zeınetkerler, Qazaqstan Respýblıkasy aldyndaǵy erekshe eńbegi úshin zeınetaqy taǵaıyndalǵandar jáne basqa da azamattar bar.
Járdemaqy mólsheri alýshynyń sanatyna baılanysty jáne 2,13-ten 138,63 aılyq eseptik kórsetkishke deıin ózgerip otyrady. Arnaıy memlekettik járdemaqy mólsheri jyl saıyn AEK mólsheriniń artýyna baılanysty, respýblıkalyq bıýdjet týraly zańda belgilengen tártip boıynsha kóterilip otyrady.
Aıta ketý kerek, eger azamat birneshe negiz boıynsha AMJ alýǵa quqyly bolsa, járdemaqy tek olardyń bireýi boıynsha, óz tańdaýy eskerilip tólenedi.
Qazaqstan Respýblıkasynda turaqty turatyn sheteldikter men azamattyǵy joq tulǵalar da QR azamattarymen teń dárejede arnaıy memlekettik járdemaqy alýǵa quqyly. AMJ taǵaıyndaý úshin ótinishti eGov.kz portaly arqyly nemese halyqqa qyzmet kórsetý ortalyqtarynda berý kerek.
Aıta keteıik, byltyr 276 myńnan astam adam ótinish berýsiz járdemaqy alý múmkindigin paıdalandy.
Qazaqstanda zeınetaqy men járdemaqy kóbeıdi.