Byltyr 16,8 myńǵa jýyq etnıkalyq qazaq qandas mártebesin aldy

Eńbek jáne halyqty áleýmettik qorǵaý mınıstrligi málimetinshe, Qazaqstanǵa kelgen qandastardyń 44,5%-y Ózbekstannan, 44,1% – Qytaıdan, 4% – Túrikmenstannan, 3% – Monǵolııadan, 2,5% – Reseıden jáne 1,9% – basqa elderden.

2026 jylǵy 1 qańtardaǵy jaǵdaı boıynsha eńbekke qabiletti jastaǵy etnıkalyq qonys aýdarýshylar sany 57,4%, eńbekke qabiletti jastan kishi 34% jáne zeınetkerler 8,6% boldy.

Eńbekke qabiletti jastaǵy qandastardyń ishinen bilim deńgeıi boıynsha 15%-y joǵary bilimdi, 27,5%-y orta kásibı bilimdi, 51,2%-y jalpy orta bilimdi, jáne 6,3%-ynyń bilimi joq.

Qonys aýdarǵan etnıkalyq qazaqtar respýblıkanyń túrli óńirine qonystandy.

Sonymen birge, qandastardy qonystandyrý úshin kelesideı eńbek kúshi tapshy óńirler anyqtaldy: Aqmola, Abaı, Qostanaı, Pavlodar, Atyraý, Batys, Shyǵys jáne Soltústik Qazaqstan oblystary.

2025 jyldyń qorytyndysy boıynsha qonystandyrý óńirlerinde 2 309 qandas qonys aýdardy, bul 2025 jylǵa bekitilgen kvotaǵa sáıkes keledi.

Joǵaryda atalǵan óńirlerde qonystanǵan qandastarǵa kóshýge sýbsıdııa túrinde memlekettik qoldaý sharalary usynylady. Bir mezgilde otaǵasyna jáne otbasynyń árbir múshesine 70 AEK (275,2 myń teńge) mólsherinde; turǵyn úı jaldaýǵa jáne kommýnaldyq qyzmetterge aqy tóleýge – bir jyl ishinde 15-ten 30 AEK (59-dan 118 myń teńgege deıin) mólsherinde.

2025 jyly 1 834 qandasqa túrli qoldaý sharalary kórsetildi. Atap aıtqanda, 428 adam turaqty jumysqa ornalastyryldy.

Sonymen qatar erikti qonys aýdarýdyń tıimdiligin arttyrý maqsatynda azamattardy soltústik óńirlerge qonys aýdarýǵa qatysatyn jumys berýshilerdi qoldaý boıynsha ınstıtýtsıonaldyq sharalar qabyldandy.

Sonymen qatar turǵyn úı satyp alý jáne salý úshin ekonomıkalyq utqyrlyq sertıfıkaty engizildi. Ótken jyly atalǵan sertıfıkatty 586 otbasy aldy.

2026 jylǵy 1 qańtardan bastap ekonomıkalyq utqyrlyq sertıfıkatynyń mólsheri 1 625 AEK-ke deıin ulǵaıtyldy.

Aıta keteıik, Senat qandastarǵa áleýmettik qoldaý kórsetetin qujatty maquldady.