Byltyr 151 kásipker tutynýshylardyń quqyǵyn buzǵany úshin jaýapqa tartylǵan
ASTANA. KAZINFORM – Bıyl elimizde tutynýshylardan túsetin shaǵym kólemi 2024 jylmen salystyrǵanda 81%-ǵa ósken. Mysaly, byltyr sáýir aıynyń sońyna deıin 16 516 adam ýákiletti mekemelerge júginse, 2025 jyldyń alǵashqy tórt aıynda 20 285 ótinish tirkelgen. Bul jóninde Qazaqstan Respýblıkasy Saýda jáne ıntegratsııa mınıstrligine qarasty Tutynýshylardyń quqyqtaryn qorǵaý komıteti málimdedi.
– Komıtet pen aýmaqtyq departamentterge 2023–2025 jyldar aralyǵynda:
2023 jyly 50 866, onyń ishinde 42 019-y ýákiletti organda qaraldy;
2024 jyly 62 561, onyń ishinde 51 771-i ýákiletti organda qaraldy;
2025 jyly alǵashqy 4 aıda 20 285, onyń ishinde 15 868-i ýákiletti organda qaraldy.
Shaǵymdardy taldaý nátıjesinde kásipkerler tarapynan tutynýshylardyń quqyqtaryn buzýdyń kóbeıgeni, bıznestiń sapasyz qyzmetter kórsetýi, sondaı-aq tutyný mádenıetiniń óskeni baıqalady, – deıdi komıtet mamandary Kazinform tilshisiniń resmı saýalyna bergen jaýabynda.
Byltyr tutynýshylardyń aryzy boıynsha 151 kásipker 11 mln teńge aıyppul tólegen.
– Komıtettiń aýmaqtyq departamentteri tutynýshylardyń quqyqtaryn buzǵany úshin kásipkerlik sýbektilerin ákimshilik jaýapkershilikke tartý boıynsha jumys júrgizýde. Osylaısha, 2024 jyl qorytyndysy boıynsha aýmaqtyq departamentter jospardan tys 1 253 tekserý júrgizdi. Al 2023 jyly 558 tekserý júrgizilgen. 2024 jyly 151 bıznes sýbektisi 10 971 342 teńge aıyppul túrinde ákimshilik jaýapkershilikke tartyldy. 2023 jyly 53 kásipker jalpy somasy 4 692 900 teńge aıyppul tólegen. 1 102 bıznes sýbektisine eskertý túrinde ákimshilik jaýapkershilik qoldanyldy. Al 2 jyl buryn 618 sýbekt bolǵan edi, – deıdi jaýaptylar.
Mınıstrlik mamandarynyń aıtýynsha, 2024 jyly kásipkerler tarapynan kórsetilgen sapasyz qyzmetterdiń kesirinen tutynýshylarǵa kelgen shyǵyn kólemi aldyńǵy jylmen salystyrǵanda eki esege artqan.
– 2024 jyldyń qorytyndysy boıynsha tutynýshylarǵa 2 067 800 000 teńge qaıtaryldy, ótken jyldyń sáıkes kezeńimen salystyrǵanda 193%-ǵa ulǵaıý baıqalady. 2023 jyly tutynýshylarǵa 1 071 400 000 teńge qaıtarylǵan, – deıdi Tutynýshylardyń quqyqtaryn qorǵaý komıteti.
Aıta keteıik, jaqynda Senat qarjy qyzmetterin tutynýshylardyń quqyqtaryn kúsheıtýge baǵyttalǵan zań jobasyna birqatar túzetý engizip, ony Májiliske qaıtardy.