Byltyr 124 myń juptyń nekesi qıylsa, 61 jup ajyrasýǵa ótinim bergen

ASTANA. KAZINFORM — 2024 jyly 124 myń juptyń nekesi qıylsa, 61 jup ajyrasýǵa ótinim berdi. Bul týraly Ádilet mınıstri Erlan Sársembaev málim etti.

— Kelesi kezek kúttirmeıtin másele — alıment tólemderi, ıaǵnı bul áleýmettik mańyzdy sanattardyń biri. Óıtkeni, alıment kámeletke tolmaǵandardyń quqyqtaryna áser etetindikten jáne oryndalý merzimi balanyń kámelet jasyna (18 jyl) tolǵanǵa deıin sozylýy múmkin. Jyl basynda oryndaýda 283 myń qujat boldy, onyń 12 835-i nemese 4% paıyzy problemaly sanatqa jatqyzylǵan jáne olar boıynsha alıment tólenbeı jatyr. Olarǵa qatysty atqarýshylyq qujattyń oryndalýyn qamtamasyz etetin májbúrlep oryndatý sharalary qoldanylady, — dedi E. Sársembaev Parlament Májilisinde jeke sot oryndaýshylary ınstıtýtynyń problemalary taqyrybyna arnalǵan Úkimet saǵatynda.

Onyń aıtýynsha, alıment óndirip alý týraly atqarýshylyq qujattardy oryndaý kezindegi negizgi problemalar turaqty tabystyń nemese múliktiń bolmaýyna, al keıbir jaǵdaıda tabystardy qasaqana jasyrýǵa qatysty oryn alyp jatady.

— Jumyssyz boryshkerler boıynsha júıeli túrde olardy jumysqa ornalastyrý boıynsha is-sharalar atqarylyp jatyr. Máselen, jumysqa ornalastyrylǵan boryshkerlerdiń sany jyl saıyn artyp keledi (2020 j. — 1 559, 2021 j. — 2 224, 2022 j. — 2 150, 2023 j. — 4 238) jáne 2024 jyly 6 232 boryshker qamtyldy, — dedi mınıstr.

Boryshkerlerge qatysty qoldanylatyn sharalardyń eń sońǵy satysy — olardy ákimshilik jáne qylmystyq jaýapkershilikke tartý. Alaıda, bul sharalardy qabyldaý alıment tólemeý máselesin tolyǵymen sheshpeıdi eken.

— Balalaryn asyraýǵa nıettiń bolmaýy, alıment tóleýden jaltarý otbasylyq-neke qatynastary daǵdarysynyń saldaryn baıqatyp otyr. Buǵan dálel — byltyr tirkelgen 61 080 ajyrasý sanyn quraıtyn statıstıkalyq kórsetkish, bul kórsetkish neke qııý sanynyń (124 774) jartysyna jýyǵyn qurady. Osy tusta, otbasy ınstıtýtyn nyǵaıtý jáne balalardyń múddelerin qorǵaý boıynsha jaýapty memlekettik organdardyń keshendi jumys júrgizýi qajet dep sanaımyz. Alıment tólemderin óndirý Mınıstrliktiń erekshe baqylaýynda, — dedi vedomstvo basshysy.

Budan buryn habarlanǵandaı, Ádilet mınıstrligi tsıfrlyq sot oryndaýshy júıesiniń alǵashqy nátıjelerin tanystyrdy.